Mazkur bosqichda Jizzaxning "Zomin" hamda Ohangaronning "Rubin" klublari o'zaro to'qnash kelishdi. Qiziqarli va keskin kurashlarga boy o'tgan o'yin taqdirini penaltidan kiritilgan yagona gol hal qildi. Birinchi bo'limning 25-daqiqasida zominliklar o'z jarima maydonlari ichida "Rubin"ning yosh hujumchisi Abdulboriy Vositjonovga nisbatan qo'pollik ishlatishdi. Bosh hakam tomonidan belgilangan penaltini Doniyor Inomov aniq amalga oshirib o'yindagi hisobni ochdi. Uchrashuv yakuniga qadar har ikki jamoa vakillarida to'p kiritish uchun imkoniyatlar yuzaga kelgan bo'lsa-da, o'yinda boshqa gol urilmadi.
O'zbekiston Soca Cola kubogi.
Uchinchi saralash bosqich.
"Zomin" - "Rubin" 0:1
Zomin. "Zomin" markaziy o'yingohi.
Hakamlar: SHuhrat Rajabov, Doniyor Qodirov, Bunyod Turdiev
Nazoratchi: Hushvaqt Muhtorov
Komissar: Qudrat Madraimov
Gol: Doniyor Inomov-pen., 25 (0:1)
SHu tariqa har ikki jamoa mazkur musobaqaning guruh bosqiga yo'l oldi. "Zomin" jamoasi “D” guruhidan o'rin olgan bo'lsa, "Rubin" klubi "E" guruhida o'ynaydigan bo'ldi.
"Zomin" jamoasi O'zbekiston Coca Cola kubogining saralash bosqichida bugungi o'yinga qadar quyidagicha natijalar qayd etgan.
Birinchi saralash bosqich.
"Zomin" - "Lochin" 6:0
Ikkinchi saralash bosqich.
"CHig'atoy" - "Zomin" 1:3
Ohangaronning "Rubin" klubiga esa saralashning uchinchi bosqichiga etib kelish oson bo'lgani yo'q. Jamoa saralashning birinchi va ikkinchi bosqichida 120 daqiqa davomida o'ynashga majbur bo'lgandi.
Birinchi saralash bosqich.
"Rubin" - "Lokomotiv-BFK" Asosiy va qo'shimcha bo'limlar 1:1. Penaltilar seriyasi - 4:1
Ikkinchi saralash bosqich.
"G'ijduvon" - "Zomin". Asosiy vaqt 0:0. Qo'shimcha bo'limlar 0:1
Birinchi liganing 1-turida "Jomboy" bilan bo'lib bahsdagi mag'lubiyatdan "Rubin" klubi bosh murabbiyi Yavor Nadjafaliev istefoga chiqarilgandi. Etiborlisi, ohangaronliklar bugun Zominga bosh murabbiysiz borishdi va yakunda g'alaba bilan qaytishdi. "Rubin" safida O'zbekiston Coca Cola kubogining saralash bahslarida 20 yoshli hujumchi Abdulboriy Vositjonov eng faol ishtirok etgan futbolchi sifatida qayd etiladigan bo'ldi. Yosh hujumchi saralash bahslarining birinchi va ikkinchi bosqichlarida gol urib raqiblari darvozasini ishg'ol etgan bo'lsa, bugun aynan unga ishlatilgan qo'pollikdan so'ng "Rubin" vakillari penalti tepish imkoniyatiga ega bo'ldilar.
Malumot uchun, O'zbekiston Coca Cola kubogi uchinchi saralash bosqichida g'olib bo'lgan jamoa "E" guruhidan o'rin olsa, mag'lub bo'lgan jamoa esa "D” guruhiga joylashardi. Guruhlarga etibor qaratsak, "Rubin" jamoasi "E" guruhida "Nasaf", "So'g'diyona" va "Bunyodkor" klublariga qarshi kurashsa, "Zomin" "D” guruhida "Navbahor", "Olimpik" va "Oq-tepa" jamoalariga qarshi maydonga tushadigan bo'ldi. Bu o'rinda "Rubin" jamoasiga musobaqaning guruh bosqichida Superliga jamoalari ro'para kelganini hisobga olsak, ohangaronliklarga birmuncha qiyin bo'lishi turgan gap.
Bekzod Tolibov tayyorladi
Bosh sahifaga
286