4ta o'yin o'tkazadigan Eron 27 may, 3ta o'yin o'tkazadigan O'zbekiston 21 may kuni yig'iladi

O'zbekiston milliy terma jamoasi Saudiya Arabistonida bo'lib o'tadigan o'yinlarga tayyorgarlikni 21 maydan boshlashi malum qilindi. SHunday qilib terma jamoaga nomzod futbolchilar 21 may kuni Toshkentda to'planadi. To'xtab qolgan JCH saralashdagi ilk o'yinni 7 iyun kuni o'tkazishimizni hisobga olsak, terma jamoa 17 kun (!) oldin yig'iladi. 

Malum bo'lishicha, 21 may kuni jam bo'ladigan terma jamoa bir haftalik yig'inni Bo'stonliq tumanidagi CHimyon tog' yonbag'irlarida olib boradi. Bir haftalik yig'indan so'ng vakillarimiz Dubayga yo'l olib, u erda 29 may kuni Avstraliyaga qarshi o'rtoqlik uchrashuvi o'tkazamiz. 

SHundan so'ng milliy jamoa to'g'ri Saudiya Arabistoni tomon parvoz qiladi va Ar Riyodda 7 iyun kuni bo'ladigan o'yinga hozirlikni davom ettiradi. Eslatib o'tamiz, O'zbekiston terma jamoasi JCH saralash ikkinchi bosqichidagi oxirgi 3ta uchrashuvni Singapur (7 iyun), Yaman (11 iyun) va Saudiya Arabistoniga (15 iyun) qarshi o'tkazadi. Jamoa oldiga har uchala bahsda g'alaba qozonish vazifasi qo'yilgan. 

Eron terma jamoasi ham o'z rejalarini malum qildi. Bizdan farqli o'laroq eronliklarni oldinda 4ta rasmiy bahs kutmoqda. Ular Manamada o'tkaziladigan markazlashgan musobaqada Gonkong (3 iyun), Bahrayn (7 iyun), Kambodja (11 iyun) va Iroq (15 iyun) termalariga qarshi maydonga tushishadi. Etibor bering, Eron terma jamoasi ilk uchrashuvni 3 iyunda o'tkazadi, ammo bu o'yinga tayyorgarlikni 17 kun oldin boshlamaydi, balki bir hafta qolganida, yani 27 maydan yig'iladi. 

27 may kuni yig'iladigan Eron terma jamoasi Tehronda uch kunlik mashg'ulot o'tkazib, 31 may kuni Bahraynga uchib ketadi. Ular o'yindan ikki-uch kun oldin manzilga etib borishadi. Biz esa birinchi o'yindan bir hafta oldin Saudiyada bo'lamiz. Farqi shundaki, Eron terma jamoasi hech kim bilan o'rtoqlik uchrashuvi o'tkazmaydi. Har holda hozircha bu haqda malumot berilmagan.

Ko'rinib turibdiki, bizda tayyorgarlik Eronga nisbatan ancha jiddiy va uzoq davom etadi. Terma jamoa manfaati uchun ichki chempionat salkam bir oylik tanaffusga chiqadi. Aytaylik, Avstraliya bilan o'yin hal qilingani bu juda yaxshi. Rasmiy bahslar oldidan o'rtoqlik uchrashuvi o'tkazish doim foyda beradi. Lekin ungacha ham Superligada hech bo'lmasa bitta turni o'tkazib olishimiz mumkin edi. Har holda qo'shimcha bitta turda maydonga tushish futbolchilarga CHimyonda bir haftalik mashg'ulotdan ko'ra ko'proq yordam berardi degan fikrdaman.