O'tgan turda joriy mavsum chempioni rasman aniq bo'ldi — "Inter". Ayni paytda CHempionlar Ligasining uch o'rni uchun bo'lgan kurash tobora avj olmoqda. "Atalanta" ikkinchi pog'onada, ammo u 3-o'rinni band etib turgan "Yuventus" bilan teng - 69 ochkoga ega. "Napoli"ni 5-o'ringa tushirib yuborgan "Milan" 4-pog'onani egalladi. 6-o'rin "Lacio"ga, keyingisi esa "Roma"ga nasib etib turibdi. 34-tur natijalaridan so'ng "Parma" va "Krotone" B Seriya tomon yo'l oldi. "Benevento" elitada qolishi uchun esa hali imkoniyati bor.
Tur intrigalari: Parma va Krotone elitadan chiqib ketdi, Inter esa — chempion!
34-tur butkul "Inter" foydasiga hal bo'ldi: milanliklar "Krotone"ni (2:0) mag'lub etdilar. "Atalanta" esa "Sassuolo"ga qarshi bahsda ochko yo'qotdi (1:1). Sassuolodagi o'yin tugagan zahotiyoq "neradzurri" muxlislari chempionlik g'alabasini nishonlay boshladilar. Pyacca del Duomo maydonida 30 mingga yaqin tiffozi yig'ildi. Koronavirus tufayli ommaviy yig'ilishni taqiqlovchi choralar ham "Inter" muxlislariga to'sqinlik qilolmadi.
Kimdir kulsa, boshqasi yig'laydi deganlaridek, bu vaqtda "Krotone" bo'lajak chempion bilan o'yinda, "Parma" esa "Torino"ga qarshi bahsning final hushtagidan so'ng (0:1) elita bilan xayrlashdi.
Haftaning top-yangiligi: Joze Mourino Rimda!
Italiyaning deyarli barcha gazetalarida kutilmagan yangilik chop etildi: "Special One" Italiyaga qaytmoqda! Joze Mourinoning yangi klubi — "Roma".
Bir necha kun avval rimliklar Paulu Fonsekani ishdan bo'shatishini malum qilgandi. Murabbiylik ruliga eng asosiy nomzod Mauricio Sarri bo'lib turgandi, biroq "jallorossi" barchani shok holatiga tushirib, Mourino bilan shartnoma imzoladi. Mavsum tugagandan keyingina portugaliyalik ishga kirishadi.
"Yuventus", "Napoli", "Fiorentina" va "Sassuolo"da ham murabbiylar almashinuvi bo'ladimi?
Rimliklar yangi murabbiyi haqida allaqachon xabar berdi. Lekin Italiyadan bundan ham ko'prog'ini kutish mumkin. Hozir bazi jamoalar, mavsum so'ngida esa deyarli hamma klub yangi yo'lboshchi izlash payiga tushib qoladi. Bir qator gazetalarning yozishicha, Luchano Spalletti "Napoli"ni boshqarishga rozi bo'lgan emish.
"Fiorentina" bilan hammasi tushunarli, amaldagi murabbiy Juzeppe Yakini yozgacha Florenciyada bo'ladi. Klub esa yangi mutaxassis izlash bilan band. "Sassuolo"da vaziyat biroz boshqacha. Klub murabbiyni haydayotgani yo'q, ammo Roberto De Dzerbi o'zi klubdan ketmoqchi. La Gazzetta dello Sport nashrining yozishicha, italiyalik Doneckning "SHaxter" klubida ish boshlashga yaqin turgan ekan. Xo'sh, Roberto ketsa, uning o'rnini kim egallaydi? Balki Eusebio Di Franchesko...?!
Neapolda g'alati ishlar sodir bo'lmoqda — Jennaro Gattuzo ijobiy natijalarga qaramay, mavsum so'ngida klubdan ketadi...
Turindagi vaziyat bo'yicha mish-mishlar tarqab ketdi. Andrea Pirlo klubdan ketishga yaqin turibdi. Tuttosport malumotiga ko'ra, Zinedin Zidan ("Real Madrid") va Jennaro Gattuzo ("Napoli") Pirloning o'rniga asosiy nomzod sifatida ko'rib chiqilgandi. Andrea Anelli ancha vaqtdan beri Zidan bilan ishlashni xohlaydi, ammo francuzning maoshi bunga to'sqinlik qilmoqda. Massimiliano Allegri esa jamoaga qaytishi mumkin, lekin bu bilan Fabio Paratichi va Pavel Nedved klubdan ketishga majbur bo'lishi turgan gap.
"Sassuolo" Konferenciyalar Ligasiga chiqa oladimi?
"Neroverdi" "Atalanta" bilan durangdan so'ng, 7-pog'onaga yaqinlashib oldi va ikki ochko bilan "Roma"dan ortda qolmoqda. SHunday bo'lsa-da, UEFA yangi turnirida ishtirok etish uchun imkoniyati bor. Biroq 7-o'ringa chiqish oson bo'lmaydi. Sababi "Sassuolo"ning taqvimi biroz noqulay: bu turda uyda 11 o'yindan beri yutkazmayotgan "Jenoa"ga qarshi maydonga tushadi, keyin esa "neroverdi"ni "Yuventus", "Parma" va "Lacio"ga qarshi uchrashuvlar kutib turibdi. Ammo Roberto De Dzerbining raqibi — "Roma"ni ham qiyin bahslar kutmoqda: "Inter" va "Lacio". Biroq "Speciya" va "Krotone" bilan o'yinlar rimliklar foydasiga hal bo'lishi mumkin.
Markaziy uchrashuv
"Yuventus " - "Milan"
Top-4 poygasida "keksa sinora" uchun muhim uchrashuv. Jamoa ECHLga chiqsa ham, Andrea Pirlo qolishiga hech kim kafolat bermaydi. "Yuventus" oxirgi bahslarda ishonchli o'yin ko'rsatmadi: "Fiorentina" bilan durang (1:1) va so'nggi 10-daqiqada Ronalduning dubli evaziga Udinedan g'alaba bilan qaytdi. Turinda hozir notinch: na amaldagi rahbariyat kelajagi haqida, na murabbiy borasida aniq gap-so'z yo'q. Qolaversa, Krishtianu Ronaldu ham so'roq ostida turibdi. Bu albatta, turinliklar o'yiniga o'z tasirini ko'rsatadi. Biroq to'rtlikdagi o'rinni boy berish haqiqiy falokat bo'lishini jamoa yaxshi tushinib turibdi. SHu sababli, futbolchilar bor kuchini to'plab, yaxshiroq o'ynashi lozim.
"Sassuolo" (1:2) va "Lacio" (0:3)ga mag'lub bo'lgan "rossoneri" va nihoyat jarohatlardan qutildi va Turinga optimal tarkib bilan borishga tayyor turibdi. Lekin "Yuve" maydonida o'ynash jamoa uchun nihoyatda qiyin kechadi. "Milan" so'nggi bor 2011 yil Turindan uch ochko bilan qaytgandi.
"Speciya" - "Napoli"
35-tur o'yinlarini Liguriyadagi bahs ochib beradi. Ikki jamoa ham 3 ochkoni qo'lga kiritish uchun maksimal harakat qiladi. "Speciya" o'tgan tur "Verona" bilan durang (1:1) o'ynab, mehmonda mag'lub bo'lish seriyasiga nuqta qo'ydi. Liguriyaliklar uyda ishonchli o'ynashini hisobga olish kerak. Jamoa oxirgi marta o'z maydonida yanvar oyida yutkazgandi. Bu orada esa uyda 3marta g'alaba qozondi va 3 bora durang o'ynadi ("Inter" bilan ham (1:1) durang qayd etdi).
"Kalyari" o'tgan tur "adzurri"ni qiyin ahvolda qoldirdi: Neapolda durang natija qayd etildi — 1:1. "Napoli" 3-pog'onadan 5-o'ringa tushib ketdi. Rino Speciyadagi uchrashuv katta ahamiyatga ega ekanini tushinib turibdi. CHunki markaziy "Yuventus" – "Milan" bahsida bir jamoa ochko yo'qotadi. Neapolliklar esa g'alaba evaziga ECHL zonasiga qaytishi mumkin. Gattuzo shogirdlari himoyada maksimal tarzda ehtiyotkor bo'lishi kerak. Sababi Kalidu Kulibalisiz qiyin bo'lishi tayin.
"Inter" - "Sampdoriya"
Skudettoni qo'lga kiritgan Antonio Konte endi mavsum davomida maydonga kam tushgan o'yinchilarga imkoniyat berishi mumkin. Biroq tarkibni tubdan o'zgartirib yubormaydi. Taxminlarga ko'ra, Andrea Ranokkya, Roberto Galyardini, Mateo Darmian, Eshli Yang va Aleksis Sanches boshlang'ich tarkibda maydonga tushadi. "Neradzurri" hattoki shu tarkib bilan ham ochkoga ega bo'lib, mag'lubiyatsiz seriyasini davom ettirishi mumkin.
Klaudio Raneri avval aytganidek "Sampdoriya" mavsum so'ngiga qadar iloji boricha maksimal ochko to'plashi kerak. Bu jamoa o'tgan tur "Roma"ni ishonchli tarzda mag'lub etdi (2:0). Hozir genuyaliklar 45 ochko bilan 9-pog'onani band etib turishibdi.
"Jenoa" - "Sassuolo"
"Olimpiko"da bo'lib o'tgan gollarga boy o'yinda "Lacio" g'alaba qozondi. Lekin genuyaliklar juda yorqin va samarali o'yin namoyish etib, 3ta gol urdilar. "Jenoa" ketma-ket 11 uchrashuvdan buyon "Luijji Ferraris"da yutkazmayapti. Jamoa bu safar ham lol qoldirishga harakat qiladi, sababi Davide Ballardini kelganidan beri klub ancha jonlangan.
Hech kimga sir emas, Genuyada o'ynash qiyin. Biroq Roberto De Dzerbi yangi klubga ketishdan oldin hozirgi jamoasi bilan maksimal natijaga erishmoqchi. SHunday ekan, g'alaba bilan qaytishga ahd qilgani aniq.
"Parma" - "Atalanta"
"Parma" bergamoliklarga qarshi so'nggi 7 bahsning 6tasida mag'lub bo'lgan. Galdagi o'yinda ham ochkoga ega bo'lishiga deyarli umid yo'q. "Bergamasklar" esa Parmaga shiddat bilan jo'nab ketmoqdalar. Sababi "Sassuolo" (1:1) bilan o'yinda ochko yo'qotildi. Bu xatoni to'g'rilash darkor. Jan Pero Gasperini 2-o'rinni mavsum so'ngigacha saqlab qolishi shart ekanini bir necha bor takrorladi. O'yin ko'rsatkichlari bo'yicha Bergamo jamoasi liganing eng yaxshi hujum "unvon"iga ega va qolgan uchrashuvlarda ham yanada ko'proq gol urishga harakat qiladi.
SHuningdek, bizni "Udineze" - "Bolonya", "Fiorentina" - "Lacio", "Benevento" - "Kalyari", "Verona" - "Torino", "Roma" - "Krotone" kabi uchrashuvlar kutib turibdi.
Nozima Zaripova tayyorladi
Bosh sahifaga
230