"Bu yilgi – “korona” qator o'zgartirishlar kiritgan chempionatimiz ham o'z yakuniga etdi. Mavsum davomida pandemiya sabab yuzaga kelgan vaziyatlarni to'g'ri baholagan holda taqvim tuzib, davom ettirishga erishilgan chempionatni salomatlik nuqtai nazaridan jamoalarda jiddiy "incident"larsiz yakunlashda PFLning samarali tashkilotchiligini alohida etirof etmasak insofdan bo'lmas. Mart oyining qoq o'rtasidayoq to'xtatilgan chempionatdagi tanaffusda futbolchilar avvaliga individual, keyin esa jamoaviy mashg'ulotlar o'tkazib, so'nggida tig'iz grafik asosida shu kungacha etib kelishdi va yaxshigina yuklama olib ulgurishdi. Oldinda kubok o'yinlari qoldi, xolos. “Blic turnir” ko'rinishidagi kubok o'yinlarini kimdir erta, kimdir kechroq yakunlashiga to'g'ri keladi. Xo'sh, shundan so'ng, jamoalarning keyingi mavsum oldi yig'inigacha, futbolchilarga qancha muddat dam berish kerak?
Ushbu muhim savolga tibbiy nuqtai nazardan yondoshadigan bo'lsak, futbolchilarning dam olish muddati 3 haftani tashkil qilishi to'g'ri hisoblanadi. Masalan: 8-dekabrda kubok bahslaridagi yurishini to'xtatgan jamoa bemalol yangi yil bayramidan so'ng yig'ilishi, finalga etib borgan klub esa 10-yanvarlarda yig'in boshlashi mumkin (“OCHL” ishtirokchilarida biroz o'zgarish bo'lishi mumkin). Baribir, dam olish muddatining birinchi yarmi passiv dam olish bilan o'tsa, ikkinchi yarmi aktiv holda (jamoa murabbiylari tuzib bergan individual mashg'ulotlar bilan) o'tkaziladi.
Jamoani jismonan mavsumga tayyorlash uchun 6 hafta etarli ekanini inobatga olsak mavsumni bemalol fevralning ikkinchi yarmida boshlashimiz ham mumkin (yozning jaziramasida futbolchilarga etarli dam berish va ko'ngildagidek yig'in o'tkazib olish uchun). Har qalay bu variant, o'yinlari mart oyiga rejalashtirilgan terma jamoamiz uchun ham foydali, qolaversa mart oyida ikki tur o'ynab ulgurmay, yana uzoq muddat tanaffus qilgandan yaxshiroq).
Nima bo'lganda ham keyingi mavsum, muxlislar sog'ingan va ko'nikkan odatiy sharoitda o'tadi degan umiddaman", - deb yozadi Abror Pirriev o'z kanalida.
Bosh sahifaga
328