Coca Cola Superliga. 8-tur ramziy terma jamoasi
Championat.asia tur bahslari asosida tur laureatlarini aniqladi.
Bekobodning "Metallurg" klubi bu turda Toshkentda "Lokomotiv" mehmoni bo'ldi. Superligada oxirgi uchta o'yinda uchta g'alabaga erishgan "temiryo'lchilar" "Metallurg" oldida ojiz qolishdi - 1:3. Bekobod klubi ustozi Jasur Abduraimov championat.asia sayti talqiniga ko'ra 8-turning eng yaxshi murabbiyi deb topildi.
"Turon" - "Qizilqum" uchrashuvida mehmonlar 1:0 hisobida g'alaba qozonishdi. Ushbu g'alabaga jamoa darvozaboni Ignatiy Nesterovning hissasi juda katta bo'ldi. Tajribali kiper bellashuv davomida 6ta seyvni ijro etdi va jamoasi darvozasi dahlsizligini saqlab qoldi. SHu bois Championat.asia sayti talqiniga ko'ra, 8-turning eng yaxshi darvozaboni Ignatiy Nesterov bo'ldi.
Bu turda garchi mag'lub bo'lgan bo'lsa-da "Lokomotiv" yarim himoyachisi Diyor Turopov "Metallurg" darvozasiga chiroyli gol urdi va u championat.asia talqiniga ko'ra tur goli deb topildi.
Turning markaziy uchrashuvi Olmaliqda o'tdi. Unda AGMK "Bunyodkor"ni qabul qildi va irodali g'alabaga erishdi - 3:1. Uchrashuvning kattagina qismida olmaliqliklar 10 kishi bo'lib o'ynaganiga qaramay yakunda g'alaba qo'lga kiritilishda tajribali yarim himoyachi Sanjar Tursunovning hissasi katta bo'ldi. Dastlab penaltidan gol urgan Tursunov, oradan ko'p o'tmay o'yindan ham chiroyli gol urishga erishdi. SHu tariqa, ikkita goli evaziga jamoasining irodali g'alabasiga hissa qo'shgan Sanjar Tursunov championat.asia talqiniga ko'ra 8-turning eng yaxshi futbolchisi deb topildi.
O'zbekiston chempionati turnir jadvali >>>>> Superliga
Bosh sahifaga
219