Yorqin Nazarov: "Futbolchimizning oddiy vaziyatdagi xatosi tufayli gol o'tkazib yubordik, uning kimligini aytmayman"

O'yin haqida

- "Lokomotiv" jamoasini g'alaba bilan tabriklayman. O'yin haqida aytadigan bo'lsam, yigitlar qo'lidan kelganicha harakat qilishdi. Ularga issiq ob-havoda o'ynaganliklari uchun minnatdorchilik bildiraman. Etirozlar yo'q, yutqazdik. O'yin borasida kuchsiz emasdik, lekin tajriba o'z so'zini aytdi.

- Sizning ruhiy xolatingizni tushunib turibmiz. Jamoa avvalgi o'yinlardan ko'ra yaxshi o'ynadi. Jamoada yuzaga kelayotgan ruhiy tushkunlikning sababi nimada deb o'ylaysiz?

- Endi jamoa yutqazgandan keyin ruhan tushkun kayfiyatda bo'ladi. Familiyasini aytmayman, lekin futbolchimizning oddiy holatdagi xatosi tufayli gol o'tkazib yubordik. Bu professional futbolchiga xos xolat emas. Lekin yigitlarga shunaqa issiq ob-havoda o'ynaganliklari uchun minnatdorchilik bildiraman. Ular biz qo'ygan vazifalarni deyarli bajarishdi, lekin ozgina omad etishmadi.

- Yigitlarning ko'zida o't chaqnamayapti. Nega futbolchilar tezkorlik bo'yicha harakat qilishmaydi?

- Bilasizmi, o'zim ikki marta ko'rsatma berish uchun o'rnimdan turdim. Natijada tomog'im qurib qolib o'tirib suv ichim olishimga to'g'ri keldi. Takror aytaman, yigitlarga shunaqa ob-havoda yugurganining o'ziga rahmat. 17:00da o'yin boshlangani o'yinga tasir qildi. Balki shunaqa ko'ringandir, lekin bugun vaziyatlardan foydalana olmaganimiz hisobiga yutqazdik. Birinchi gol oddiy xato evaziga urildi. Tajriba bugungi o'yinda ko'zga tashlandi.

- Ko'pchilik murabbiylar qatori mag'lubiyatda aybni o'z zimmangizga olasizmi?

- Ha, albatta aybni o'z zimmamga olaman. Bosh murabbiy istefoga chiqarilgach qiyin bo'lishini bilardim. Lekin jamoa uchun harakat qilaman deb masuliyatni zimmamga oldim. Jamoa kuchsiz ekanini bilardim. Bugungi o'yindagi mag'lubiyatni zimmamga olaman, yigitlarda ayb yo'q. Aybi shuki, bir-ikki futbolchilarga daraja etishmadi. Keyingi yillarda balki ular zo'r futbolchi bo'lib etishar.

- Xato qilayotgan futbolchini baribir maydonga tushirayotganingizning sababi nima?

- Bu o'yinda bir futbolchi, oldingi o'yinda boshqa futbolchi xato qilayapti. Xatolar bor, o'yin borasida bizni o'z rejamiz bor edi. Berilgan vazifa bo'yicha harakat qildik.

- Boake birgina vaziyatdan gol urdi. O'yin unga moslab tashkil etilmayapti...

- Boake, Dimov, Jaloliddinov, Abdumannopov, Ismoilov. Bular chempionat boshlanishiga bir hafta qolganida tarkibimizga qo'shilishdi. Dimov hozir legionerlar ichida yaxshilaridan biri. Ular hozir shunchalik ham yaxshi o'ynab berishayapti. Ularni hozir jismoniy jihatdan barqaror xolatga keltirishimiz kerak. Ishlash kerak, o'z ustimizda ishlashda davom etamiz.

- “Andijon" muxlislariga nimalarni vada qila olasiz?

- Hozir yutqazdik, agar rahbariyat boshqa murabbiy haqida o'ylayotgan bo'lsa, men rahmat deb ketaman. Qo'limdan kelganicha harakat qildim. Agar jamoada qolishimga imkon berilsa yigitlarni chempionatdagi tanaffus vaqtida tayyorlab, yuqori o'rinlarga olib chiqishga harakat qilaman. Futbol borasidagi bor bilimlarimni ishga solib jamoaga g'alabalar keltirishga harakat qilaman. CHempionatning yarmida jamoani tashlab ketish noto'g'ri, muxlislarni tushunib turibman va ulardan uzr so'rayman.