Xabaringiz bor, Toshkentda o'tayotgan og'ir atletika bo'yicha yoshlar o'rtasida jahon chempionati qizg'in pallasiga kirib ulgurgan. Bugun supachaga -96 kg vazn toifasida erkaklar kurash olib borishdi.
Dast ko'tarish mashqida g'oliblik uchun asosiy kurash uch sportchi Artur Babayan, Garik Karapetyan hamda Stefan Adamus o'rtasida kechdi. Karapetyan uchinchi urinishida 162 kg toshni bo'ysundirgan bo'lsa, Babayan ikkinchi urinishida 163 kg toshni dast ko'tara oldi. Polshalik Stefan Adamus esa ikkinchi va uchinchi urinishlarida 165 kg toshni ko'tara olmadi va jahon chempionati dast ko'tarish mashqining oltin medali Artur Babayanga nasib qildi, lekin siltab ko'tarishda uning omadi u qadar chopmadi.
Siltab ko'tarish mashqida esa omad endi Polsha termasi vakiliga kulib boqdi. Adamus birinchi urinishdayoq siltab ko'tarish mashqi oltin medalini naqd qilib qo'ydi. Keyingi urininshlarida u ikkikurash natijasiga ko'ra oltin medal uchun Garik Karapetyanning natijasini yaxshilashga urinib ko'rdi, ammo buni uddalay olmadi.
Armaniston terma jamoasi vakili Garik Karapetyan esa har ikki mashqda stabillik ko'rsatib, ikkikurash natijasiga ko'ra g'oliblikni qo'lga kiritdi.
Siltab ko'tarish mashqida 194 kg natija bilan uchinchi o'rinni qo'lga kiritgan ukrainalik sportchi yakunda ikkikurashda ham g'oliblik shohsupasidan joy egalladi.
P.S: Eslatib o'tamiz, ushbu musobaqa o'tgan yili o'tkazilishi zarur edi. Biroq pandemiya sabab qoldirilgan va shu sababli, bazi sportchilarning yoshi endilikda yoshlar kategoriyasiga to'g'ri kelmaydi. SHuning uchun, IWF ularga musobaqada ishtirok etish imkoniyatini yaratib berdi, lekin ular medallar uchun nomzod bo'la olmasliklarini kelishib oldi. Polshalik sportchiga aynan shu sabab medal topshirilmadi.
Og'ir atletika bo'yicha yoshlar o'rtasidagi jahon chempionati
Erkaklar, -96 kg
1. Garik Karapetyan - 355 (162 + 193) kg;
2. Artur Babayan - 354 (163 + 191) kg;
3. Ilya Moskalenko - 349 (156 + 194) kg.
Bosh sahifaga
93