Boisi, qo'qonliklar ushbu mavsumda nafaqat o'yin tomonlama balki, natija borasida ham avvalgi yillarga qaraganda yaxshiroq ko'rsatkich qayd etishdi. Jamoa 2019 yil 11 pog'onani egallagan bo'lsa, bu mavsumda katta o'sishga erishgan holda olti pog'ona yuqoriladi va yakunda kuchli beshlikdan o'rin oldi. Bunday jamoa O'zbekiston kubogida ham uzoqroqqa borishni ko'zlashi tabiiy. Biz esa kubok bahslari boshlanishidan oldin "Qo'qon -1912"ning muvaffaqiyatlariga hissa qo'shib kelayotgan futbolchi Sardor Azimovning fikrlariga quloq tutdik.
- "Qo'qon-1912" uchun bu yilgi Superliga har doimgidanda muvafaqqiyatli o'tdi. Jamoa yuqori o'rinlar uchun kurashdi, raqobatchilarga jiddiy qarshilik ko'rsata oldi. Sizda ham yakunlangan Superligadan o'zgacha taassurotlar qolgan bo'lsak kerak...
- Albatta, joriy yilgi Superliga bahslari biz uchun ajoyib g'alabalarga boy tarzda o'tdi. Murosasiz kechgan o'yinlardan keyingi g'alaba, hissiyotlarni pulga sotib olib bo'lmaydi. Alamli mag'lubiyatlar ham bo'ldi. Ayniqsa ayrim futbolchilarimiz og'ir jarohat olib safimizdan chiqishdi. SHohnazar Norbekov, Suhrob Berdievlarning g'alabalari dilni hira qilgani rost. Mana u kunlar o'tib davolanib safimizga qaytishmoqda.
- Klubning muvaffaqiyatlari ahil va inoq jamoa yig'ilgani sabab qo'lga kiritildimi? AGMK, "Bunyodkor", "Lokomotiv" kabi jamoalardan ochko tortib olishni uddasidan chiqdinglar
- Jamoaning ahilligiga murabbiylar shtabini sabab sifatida ko'rsatgan bo'lar edim. Ular bizlarning har bir o'yinga puxta tayyorgarlik ko'rishimiz uchun anchagina mehnat qilishdi. Jamoa rahbari pandemiya paytida ham maoshlarimizni vaqtida berib turdi. Murabbiylar maydonda jang qilishimizni, oxirigacha kurashishimizni va uning har bir qarichi uchun borimizni berishni singdirishdi.
- Sovrinli o'rinlardan birini qo'lga kiritishga juda yaqin keldi jamoa...
- Aslida maqsadimiz ham sovrinli o'rinlar uchun kurash olib borish va "Qo'qon-1912"ning tarixini yaratish edi. "Nasaf"ga 0:1 hisobida engilganimizdan so'ng imkoniyatlarimiz pasayib ketdi. O'zimizning xatolarimiz sabab medallar uchun kurashdan chiqib ketdik.
- Faoliyatingizdagi mavsumlar orasida bu yilgisini ajratib ko'rsata olasizmi?
- Futbolchi sifatida bu yil men uchun qiyin o'tdi. Uchinchi turdan so'ng pandemiya sabab katta tanaffus yuzaga keldi. 2020 yilgi Superligani kurashchan va ahil jamoa bilan o'tkazganimdan xursandman.
- Baxtiyor Ashurmatov qo'l ostida to'p tepish davomida qaysidir kamchiliklaringizni va xatolaringizni bartaraf etgan holda o'sishga erisha oldingizmi?
- Baxtiyor Ashurmatov boshqaruvidagi jamoada birinchi marotaba o'ynadim. To'g'risi Baxtiyor aka ochiq ko'ngil inson. Kamchiliklar va xatolar bo'lsa yuziga aytadi. Futbolchilik faoliyatlarida ham kurashuvchan bo'lganlar. Ulardan har qanday holatda ham to'xtab qolmasdan kurashish kerakligini o'rgandim.
- Ertadan kubok bahslariga start beriladi. Odatda dekabr oyida jamoalarimiz dam oladi va tiklanishga etibor qaratardi...
- Baxtiyor akani kuboklardagi tajribalari katta. Buni AGMK jamoasi orqali isbotlaganlar. Endilikda buni "Qo'qon-1912"da takrorlamoqchimiz. Alabbat muxlislarimizning qo'llab-quvvatlashi bizga qo'shimcha kuch beradi. Ulardan birinchi galda o'zlarini va yaqinlarini ehtiyot qilishlarini so'rab qolaman. SHundagina jamoamizga butun vujudlari bilan muxlislik qila olishadi. Qo'qonda jonkuyar muxlislar juda ham ko'pchilikni tashkil qiladi.
Abdulaziz Iskandarov suhbatlashdi.
Bosh sahifaga
401