"Jar" stadionida o'tkazilgan bahsda "Oq-tepa" va "Olimpik" jamoalari o'zaro to'qnash kelishdi. Uchrashuv "Olimpik"ning 2:0 hisobidagi g'alabasi bilan yakunlandi.
"Olimpik" — Italiya, "Oq-tepa" — Turkiya...
Evropa chempionatining 11 iyun kuni o'tkazilgan ochilish o'yini yodingizdan ko'tarilmagan bo'lsa kerak. Unda Roberto Manchini boshchiligidagi "Skuadra Adzurra" SHenol Gyuneshning Turkiyasi ustidan 90 daqiqa "hukmronlik qildi". "Jar" stadionida o'tgan o'yinda ham o'sha scenariy takrorlandi. O'yin faqat "Olimpik" futbolchilarining ustunligi ostida o'tdi. "Oq-tepa" esa 1,5 soat ichida xuddi turklar singari raqib darvozasini 1 bor aniq nishonga olishni uddaladi.
Behzod SHamsiev — "motor"...
O'yin Timur Kapadze shogirdlarining ustunligi ustida o'tganini aytdik ("Neftchi" bilan o'yinning 2-bo'limida ham shunday holat kuzatilgandi). Buning asosiy sababi sifatida "Olimpik" maydon markazini to'liq egallab olayotganini ko'rsatish mumkin. Tayanch nuqtasida jamoa sardori Behzod SHamsievning ishonchli harakatlari uning 2 yonida o'ynayotgan Abdurauf Bo'riev va Bektemir Abdumannonovning ancha oldinga chiqib, hujumlarni qo'llashiga imkon yaratyapti.
SHu tufayli Bo'riev so'nggi 2 bahsda gol urishni ham uddaladi. Takidlash lozimki, maydon markazida motor vazifasini bajarayotgan Behzod SHamsiev chempionatning dastlabki turlarida markaziy himoyada o'ynagan edi. Uni oxirgi bahslarda tayanchga o'tkazgan murabbiyning topqirligiga tasanno.
Futbolchilar emas, murabbiy yutqazdi
Yodingizda bo'lsa, 10-tur doirasidagi "Neftchi" bilan o'yindan keyin Timur Kapadze shunday degandi:
"Farg'onaliklar uzun pas bilan oldinga o'tishga harakat qilgani bois pressingdan voz kechdik va uzatmalarni egallab olib, qarshi hujum taktikasini tanladik".
Eng qizig'i, kecha "Oq-tepa" ham bir tur oldin "Neftchi" yo'l qo'ygan xatoni takrorladi. Jamoa murabbiyi Alisher SHog'ulomov (yoki Ildar Sakaev) foyda bermasa ham, o'yin oxiriga qadar uzun pas bilan oldinga o'tishga harakat qildi. Ammo, jamoaning 95 foiz shunday uzatmalari "Olimpik" himoyachilari tomonidan "tozalandi". SHu tufayli "Oq-tepa" 90 daqiqa ichida 2-aniq zarbasini yo'llashga imkon topolmadi. Bir so'z bilan aytganda, jamoa o'yinga noto'g'ri taktika tanlagan edi va uni uchrashuv oxiriga qadar o'zgartirmadi.
Uchrashuvdan keyin...
"Olimpik" ustozi Timur Kapadze o'yin haqida shunday dedi: "Oq-tepa" bilan birinchi marotaba o'ynayotganimiz yo'q. SHuning uchun munosib tayyorgarlik ko'rdik. "Neftchi"ga qarshi o'yinda ko'p kuch yo'qotilgani uchun balki bugun ruhiy tomondan charchoq sezilgandir. SHu tomondan xavotir bor edi. Yigitlarga har bir o'yinga alohida munosabatda bo'lish kerakligini, avvalgi turdagi g'alabani esdan chiqarish kerakligini aytdim. Ko'rganingizdek yaxshi harakat qilishdi va ishonchli tarzda g'alaba qozonishdi. To'g'ri kamchiliklar, xatolar kuzatildi. Albatta buni ustida ishlaymiz. Mavsum startidagi o'yin bilan hozirgi uchrashuvni solishtirgan shogirdlarimda o'ziga bo'lgan ishonchi ortdi, o'yin tomonlama o'zlarini yaxshi his qilishmoqda. Menimcha haqli g'alaba qozondik".
"Oq-tepa" murabbiylari esa matbuot anjumanida ishtirok etmadi. Malumot uchun, reglament 20-bobining 6-bandida shunday yozilgan: Superliga va Pro liga klublari bosh murabbiylari uchrashuvdan keyingi matbuot anjumanida ishtirok etishlari shart.
Musobaqa jadvalidagi holat
11-turdan keyin "Olimpik" hisobidagi ochkolar soni 20 taga etdi. Kapadze shogirdlari hozircha musobaqa jadvalini "Buxoro" bilan birga boshqarib turishibdi. Ammo, bittadan kam o'yin o'tkazgan "Neftchi" va "Dinamo" jamoalari o'z o'yinlarida g'alaba qozonishsa, peshqadamlikni qaytarib olishadi.
Keyingi bahslar
"Olimpik" keyingi turda Buxoroga safar qilsa (19 iyun), "Oq-tepa" Sirdaryoda "Yangier" mehmoni bo'ladi (20 iyun).
Bosh sahifaga
233