Bo'lajak bahs yuqori ahamiyat kasb etishini inobatga olib, o'z vaqtida milliy terma jamoamiz tarkibida ko'plab uchrashuvlarda ishtirok etgan Marat Bikmaevning fikrlarini bilishga qiziqdik. Bugungi kunda Toshkentning “Lokomotiv” jamoasi sharafini himoya qilayotgan tajribali futbolchi, avvaliga intervyu berishni istamadi. Ammo suhbat MTJ o'yini xaqida o'tishini bilib, keyin rozilik berdi.
- Bugun O'zbekiston milliy terma jamoasi JCH-2022 saralashi doirasida Saudiya Arabistoniga qarshi muhim uchrashuvini o'tkazadi. Bo'lajak o'yin oldidan fikringizni bildirib o'tsangiz?
- Mazkur bahs juda muhimligini barcha yaxshi tushunib turibdi. O'yin oson o'tmasligi aniq. Bugun terma jamoamiz kuchli raqibga qarshi safarda o'ynaydi. Saudiya Arabistoni terma jamoasi vakillari mezbon sifatida biroz bosim ostida o'ynashini hisobga olsak, bu borada ustunlikka egamiz. Har bir o'yinda yigitlar faqat natija uchun kurashib kelmoqda. Menimcha bugun natija degan fikrni miyadan chiqarib yuborib o'ynash foydadan xoli bo'lmaydi. Natijani o'ylab maydonga tushadigan bo'lsak, bosim kuchayadi. Erkin xarakat qilish kerak. Menimcha bugun qaysi terma jamoa ruhiy tomondan kuchli bo'lsa o'sha yutadi. Umid qilamanki, terma jamoamiz bugun g'alaba bilan xalqimizni xursan qiladi.
- O'zbekiston milliy terma jamoasining oxirgi o'tkazgan ikkita o'yinidan kelib chiqib, aytadigan bo'lsak, sizningcha bugun tarkibda qanday o'zgarishlarni ko'rishimiz mumkin?
- Buni avvalo murabbiy hal qiladi. Yamanga qarshi kechgan uchrashuvda bosh murabbiy menimcha etakchi o'yinchilarimizga dam berib, Saudiya Arabistoniga qarshi o'yinga saqlab olib qo'ygan. Terma jamoamizga kuchli futbolchilar taklif etilgan. Ularning har biriga ishonaman. Ularga faqat omad tilayman.
- Bugungi o'yinda qanday hisob qayd etilishini kutyapsiz?
- To'g'risi uchrashuvlardan oldin hisobni bashorat qilishni istamayman. Muhimi g'alaba bo'lsin.
Muhammadjon suhbatlashdi.
Bosh sahifaga
461