Ajoyib o'yinlari bilan muxlislar qalbidan o'rin olgan Boyan Miladinovich 2015 yilda "Paxtakor"ni tark etdi. "SHerlar" rahbariyati serbiyalik futbolchining o'rnini to'ldirish ustida uzoq bosh qotirishdi va CHernogoriyadan munosib variant topishdi. Bu - yosh, bo'ydor va jismonan baquvvat Adnan Oraxovac edi.
Adnan ishonchni oqladi. Klubdagi ilk mavsumidayoq mamlakat chempionligini qo'lga kiritilishida munosib hissa qo'shdi. "SHerlar"ning asosiy himoyachilaridan biriga aylandi. "Paxtakor"da 2,5 yil o'ynab, jamoa uchun Oliy Ligada 66 o'yin o'tkazdi va 6 bor raqib darvozabonlarini ranjitdi. 2017 yilda klubda katta o'zgarishlar yuz bergani bois ko'plab futbolchilar qatori jamoa bilan xayrlashishga qaror qildi va ikkinchi davrani "Dinamo"da o'tkazdi. Biroq, Samarqand klubi mavsum oxirida quyi ligaga tushib ketgach, O'zbekistonni tark etdi.
1991 yilda tug'ilgan futbolchi ayni paytda Tailandning "Prachuap" klubi sharafini himoya qilyapti. Malumot uchun, Oraxovac Tay Liganing yakuniga etgan mavsumida 19 o'yinda ishtirok etdi. Uning jamoasi yakunda 16 jamoa orasidan 10-o'rinni egalladi.
2017 yilning yozida "SFI Management Group" "Paxtakor" homiysiga aylandi va inqirozdagi jamoani kuchaytirish ishlari boshlab yuborildi. Oraxovac ham ayni shu paytda klubdan ketgan edi. SHota Arveladze uning o'rnini boshqa bir chernogoriyalik himoyachi bilan to'ldirdi. Gap "sherlar" tarkibiga "Rostov"dan erkin agent sifatida kelib qo'shilgan Marko Simich haqida boryapti.
Gruziyalik mutaxassis unga katta umid bog'lagan edi. Sardorlik bog'ichining Markoga topshirilishi so'zimizning isboti bo'lsa kerak. Simich esa 2,5 yil davomida klub uchun 53 o'yin o'tkazib, 7 ta golga mualliflik qildi.
2020 yilning yanvarida Toshkent klubi qarorgohini tark etgan himoyachi yozgacha erkin agent maqomida yurdi va iyun oyida Latviyaning "Liepaya" klubi bilan shartnoma imzoladi. Marko Simich ayni paytda ham mazkur jamoa sharafini himoya qilyapti. U Latviya chempionatining joriy mavsumida 11 o'yinda maydonga tushishga ulgargan. Simich "Liepaya" jamoasi sardori ekanini ham alohida takidlash lozim.
JCH-2014 finalining qahramoni hozir qaerda?
Bosh sahifaga
101
