Bugun Toshkentda bitta, Olmaliqda bitta o'yin bo'ladi. "Paxtakor" stadionida "Surxon" - "Paxtakor" uchrashuvi bo'lib o'tadi. Olmaliqdagi o'yingohda "Andijon" - AGMK bahsi o'tkaziladi.
SHu bir narsa doim hayron qoldiradi. Projektor masalasi har yili ko'tarib kelinadi. Lekin mavsum boshida hamma tinchgina o'z maydonida o'ynaydi. Negaki bahor oylarida salqin bo'ladi. O'yin vaqtli boshlanib vaqtli tugaydi, projektorni yoqishga hojat qolmaydi.
Lekin may oxiri - iyun kelishi bilan muammolar boshlanadi. Yana projektor masalasi kun tartibiga chiqadi. Keskin qarorlar qabul qilinadi. Qaysidir kungacha muhlat beriladi. Ammo shunday stadionlar borki, besh yillab projektorga tegmaydi. Qarorlar qog'ozda qolib ketaveradi. Yozning issiq kuni kelishi bilan shoshib qolamiz, chunki o'yinlarni kechki salqinda boshlash kerak bo'ladi.
To'rtta jamoa stadionida projektor muammosi bor deyildi: "Mashal", "Surxon", "Qo'qon-1912" va "Andijon". Agar tez orada projektor masalasi ijobiy hal qilinmasa, bu jamoalar uy uchrashuvlarini neytral stadionda o'tkazishini eshitdik. Tez orada hal bo'lmasligi aniq ham edi, chunki projektor bir deganda hal bo'lib qoladigan masala emas.
Bu tur "Mashal" shundoq ham safarda o'ynadi. "Qo'qon-1912" ertaga "Nasaf" bilan o'ynaydi va uy stadioni sifatida "Turon" o'yingohini tanladi. Bu normal holat. CHunki neytral stadion. Lekin biz tushunmagan jihat, nima uchun "Surxon" - "Paxtakor" uchrashuvi "Paxtakor"da, "Andijon" - AGMK o'yini esa Olmaliqda bo'lishi kerak?
Ikkala o'yinda ham stadion egasi mehmon maqomida o'ynaydi, "Surxon" va "Andijon" go'yoki mezbondek kelib ketadi. Lekin bu nimani o'zgartiradi? Nima uchun PFL bu borada qattiqqo'l emas? Nima uchun mezbon bo'lib o'ynaydigan ikkita jamoa neytral maydon topmadi? Go'yoki mezbon maqomida stadionga kelib aslida mehmon bo'lib o'ynash nima beradi?
Qizig'i shundaki, bu jamoalar ishtirokidagi ikkinchi davra o'yini ham shu stadionlarda bo'lib o'tadi va bugun mezbon maqomidagilar kuzda mehmon bo'lib keladi. Bu o'rinda "Paxtakor"ning ham, AGMKning ham aybi yo'q, chunki stadion topish bilan mezbon klub shug'ullanadi.
Balki "Surxon" ham, "Andijon" ham boshqa stadion qidirgan, ammo topa olmagan bo'lishi mumkin. Xo'p, topmagan taqdirda ham raqib jamoa uy stadioniga borib o'ynashi g'alati emasmi?
Bosh sahifaga
135
