"Navbahor" bilan kechgan uchrashuvda Yorqin Nazarov shogirdlari 1:0 hisobida g'alaba qozondi va o'z darvozasi dahlsizligini saqlab qoldi. Himoya chizig'i vakillarining ishonchli harakatlari jamoaning yutug'ida katta rol o'ynadi, deya olamiz.
Mazkur uchrashuvdan so'ng jamoaning kam sonli tajribali futbolchilaridan biri Ibrohim Otaxonovga bir nechta savollar bilan yuzlandik.
- Darhaqiqat kecha chinakam derbi guvohiga aylandik. "Andijon" taktik tomondan "Navbahor"ni yutdi, desak mubolag'a bo'lmaydi. Tanlangan taktika va o'yin haqidagi fikrlaringiz bilan o'rtoqlashsangiz...
- Fikringizga qo'shilaman. To'g'ri aytdingiz, tanlagan taktikamiz ish berdi. Uchrashuvga tayyorgarlik jarayonida "Navbahor"ning so'nggi o'yinlarini o'rganib chiqqandik. SHundan kelib chiqib o'z o'yinimizni tashkil qilishga harakat qildik. Yakunda biz uchun omadli kecha bo'ldi. Stadionga tashrif buyurib qo'llab-quvvatlagan muxlislarimizga minnatdorchilik bildiraman.
- "Andijon" shu paytga qadar "Navbahor" maydonida g'alaba qozonishni uddasidan chiqa olmagandi. Saytimizda shu haqida ham xabar chiqqan. Istaymizmi yo'qmi baribir futbolchilar bundan xabari bo'ladi. Nima, deb o'ylaysiz, balki mazkur jihat ham jamoaga qo'shimcha motivaciya berdimi?
- Ha, jamoamizga Namanganda yutuqni qo'lga kiritish nasib qilmagandi. Yangi tarix yaratdik, desam ham bo'ladi.
- Jamoaning Superligada birinchi davradagi ishtiroki borasida nima deya olasiz? Lekin so'nggi turlarga kelib "Andijon"ning o'yinida ijobiy o'zgarish borligini payqadik...
- To'g'ri takidladingiz. Bilasiz, jamoamiz yosh futbolchilar bilan yangidan shakllanmoqda. Bu ham o'z tasirini o'tkazmasdan qolmadi. O'z o'yinimizni topib olish qiyin kechdi. Oxirgi uchrashuvlarda o'zimizga bo'lgan ishonch ortishi hisobiga o'yinimiz ham o'xshadi va mana natija ham sekin-asta keldi.
- Jamoadagi kam sonli tajribali futbolchilardan biri bo'lasiz. SHuningdek haqiqiy Andijon o'g'lonisiz desak mubolag'a bo'lmaydi. Mavsum boshida yana katta futbolga qaytdingiz. Bunga nima turtki bo'ldi ?
- "Andijon" men uchun begona jamoa emas. Klubning eshiklari men uchun hamisha ochiq, deb o'ylayman. Murabbiylar meni jamoada ko'rishni istashdi. Ularga qo'limdan kelganicha yordam berishga vada berdim.
- Klubning so'nggi yillarda jon saqlash uchun kurashgani achinarli holat emasmi?
- Jamoa oxirgi mavsumlarda Superligada qolish uchun harakat qilayotgani to'g'ri. Lekin bugungi kunda "Andijon"da katta o'zgarishlar bo'lmoqda. Klub prezidenti Juratbek Quvvatov 3 yil ichida jamoani kuchlilar qatoriga olib kirishga bel bog'lagan. Barcha birdek harakat qilmoqda. Rahbariyatning ishonchini oqlashga harakat qilamiz.
- So'nggi daqiqalarda himoyachi Usmonali Ismonalievning hujumga o'tishi oldindan o'ylangan taktika edimi?
- O'yin durangga qarab ketayotgandi. Biz oxirgi daqiqalar qolganini bilib hujumga o'tdik. Usmonali Ismonaliev hujumchi rolida juda yaxshi o'ynadi va to'pni yaxshi qabul qilib olib g'alaba keltirgan golga mualliflik qildi.
- Andijon futbolining ertasini qanday ko'ryabsiz?
- "Andijon"ning kelajagi borligi aniq. Amalga oshirilayotgan ishlar o'z mevasini berishiga ishonaman.
Abdulaziz Iskandarov suhbatlashdi
2212610318739688 
Bosh sahifaga
274
29 Yanvar 2026, 13:08