Futbolda adolat yo'q, bo'lmaydi ham!

Uchrashuvdagi keskinlik ijobiydir

Men nafaqat hayotda, balki sportning ichidagi tajovuzkorlik, agressiya va shiddatga qarshiman. SHu tufayli sportning raqibini jarohatlash, jismonan zarar etkazish asosida qurilgan turlariga yaxshi ko'z bilan qaray olmayman. Ammo, futbol maydonidagi o'yinchilar orasida yuzaga keladigan keskinlik, dahanaki janglardan noliydiganlarni ham sira tushunmayman. 

Maydondagi keskinlikdan faqat futbol yutadi. Yani, jamoalar orasida prinsipiallik paydo bo'lishi o'z-o'zidan chempionatdagi navbatchi o'yinlarni yo'q qiladi. Agar barcha uchrashuvlar "Navbahor" — "Paxtakor" yoki "Nasaf" — "So'g'diyona"dek o'tsa, odamlari allaqachon APL tomoshasidan ham voz kechishardi...

VAR haqida

Qarshidagi o'yinda VAR sistemasi ishladi va etirozlarga sabab bo'lgan epizodning asosiy ishtirokchisiga aylandi. Mazkur holat 1 yil muqaddam sodir bo'lsa, muzkur tizim yo'qligi tufayli "So'g'diyona"ning goli hisobga olinar va "Nasaf" 2 ochkodan mahrum qilinardi. Biroq, Qarshidagi o'yinda VAR ishladi va o'yin taqdiriga jiddiy tasir ko'rsatdi. 

Yuqorida aytganimdek, ushbu qarorni muhokama qilmoqchi emasman. SHunchaki, futbol maydonidagi nohaqliklarni yo'q qilish uchun ishlab chiqilgan tizimni keskin tanqid qilayotganlarga bir narsani eslatib qo'ymoqchiman: bosh hakam ham, VARda o'tirganlar ham inson va hech qaysi qul xatolardan kafolatlanmagan (shu jumladan siz ham). Xato va xiyonatning orasida ming km masofa bor. SHu tufayli har xatoni xiyonatga yo'yishning o'zi xato.

Hakamlar xato qilaversa, odalat qaerda qoladi, degan savol tug'ilishi mumkin. Ammo, unutmangki, ...

futbolda adolat yo'q.

Nima deb o'ylaysiz, kecha VAR ishga tushganidan keyin Nasibullaev golni hisobga olsa, "Nasaf" tomon etiroz bildirmas edimi? Ho'kizning bolalashiga ishonsam ham, bunga ishonmayman. Yani, Nasibullaev golni inobatga olsa ham, olmasa ham tanqidlar yomg'iri ostida qolishi aniq edi. CHunki manfaatlar to'qnashuvi yuzaga kelgan har holatda odam bolasi adekvatligini yo'qotadi. Aslida ularni ayblash ham noto'g'ri. 

Futbol shunday sportki, unda bir vaziyat uchun 3ta hakamning barchasi turli xil qaror qabul qilishi va ularning barchasi to'g'ri bo'lishi mumkin. Masalan, jarima maydoni ichida to'pning qo'l bilan o'ynalishini olaylik. SHunaqa vaziyatda Ermatov to'p qo'lni topganligi uchun o'yinni davom ettirishga qaror qilsa (1), Kollina penalti belgilashi mumkin (2). VARda o'tirgan Klattenburg esa penaltini bekor qilib (3), butunlay boshqa sabab - masofaning qisqaligini ko'rsatishi mumkin. 

Va yuqoridagi hakamlarning barchasi o'z qarorini izohlab bera oladi. SHunga qaramay, o'sha vaziyatda aziyat chekkan tomon referini adolatsizlikda ayblayveradi. Futbolda, umuman hayotda barchani birdek xursand qilishning iloji yo'q — xafalar esa mudom adolatning yo'qligidan nolishadi. Demak, bu holat to abad davom etadi. Agar futboldagi hakamlikdan inson faktorini butunlay o'chirib, kompyuterlarga topshirib qo'ysangiz ham noliguvchilar topilaveradi. Deylik, kompyuter "Paxtakor" yoki "Navbahor" darvozasiga penalti belgiladi. O'shanda ham muxlislarning bir qismi norozi bo'ladi va kompyuterni dasturlaganlarni ayblab chiqadi. Xullas, futbolda adolat yo'q. Ammo...

Taqdir adolatli

Futbol, boks yoki qaysidir sudda adolat bo'lmasligi mumkin. Biroq, taqdirning tarozisidan qochib bo'lmaydi. Bugun Ulug'bek Baqoev jamoasi va uning muxlislari "Nasaf"ga qarshi o'yindagi hakamlikdan nolib, 1 ochko tortib olinganini aytmoqda. Ularga Superliganing 2-turi doirasida Jizzaxda o'tkazilgan "Turon" bilan o'yinni eslatib qo'ymoqchiman. O'shanda "So'g'diyona"ga 3 ochko keltirgan gol 11 metrlik jarimadan urilgan, penalti esa yaypanlik futbolchi o'z jarima maydonida to'pga boshi bilan (qo'li emas!) o'ynagani uchun qo'yilgandi. Buni hamma unutgan bo'lishi mumkin, lekin taqdirning xotirasi kuchliroq...

Faxriddin Ro'ziev