"Sporting" "Inter" klubini 30 mln evroni to'lashdan bo'yin tovlaganlikda aybladi

Gap shundaki, o'yinchi o'tgan mavsumni "Sporting" tarkibida ijarada o'tkazgandi. "Sporting" klubida esa futbolchini sotib olish huquqi bor edi. 2016 yilgi shartnomada, agarda, "Inter" klubi ushbu futbolchini boshqa portugal klubiga sotib yuboradigan bo'lsa, 30 million evro miqdoridagi pulni "Sporting" klubiga to'lashi lozim edi. Ammo, yaqindagina "Inter" klubi Joau Mariu bilan shartnomasini bekor qildi. Futbolchi esa "Benfika" klubiga erkin agent sifatida kelib qo'shildi.

"Sporting" klubi "Inter" futbolchini 2016 yil imzolangan shartnomadagi bandni aylanib o'tish uchun sotmagani va o'zaro kelishib olib, shartnomani bekor qilganlikda ayblamoqda.

"2016 yil Joau Mariuni "Inter"ga sotayotganimizda, shartnomaga agarda ushbu futbolchi boshqa portugal klubiga o'tadigan bo'lsa, "Inter" 30 million evro miqdorida tovon puli to'lashi haqidagi band kiritilgandi. Ular 5 yil oldingi shartnomadagi ushbu bandni aylanib o'tishga urinishdi va o'zaro shartnomani bekor qilishdi", -deyiladi klub bayonotida.

Eslatib o'tamiz, Joau Mariu 2016 yilda "Sporting" safidan "Inter"ga transfer qilingandi. O'tgan yili esa u "Sporting"ga qaytib mavsumni ijarada o'tkazgandi.