Saudiyalik olimpiyachilar guruh bahslarini Kot-D'Ivuar, Germaniya va Braziliyaga qarshi o'tkazib mag'lubiyatga uchrashdi. Saudiya Arabistoni olimpiya terma jamoasi bu o'yinlarda 4ta gol urib, o'z darvozasidan 8 bor to'p o'tkazib yubordi.
Ushbu natijadan so'ng arab matbuoti terma jamoaning Olimpiadagi ishtirokini tahlil qildi va eng asosiy muammo sifatida futbolchilarning legioner emasligiga etibor qaratdi. Xususan matbuot bu haqda shunday yozadi:
"Olimpiya o'yinlari guruh bosqichida 16ta jamoa qatnashgan bo'lsa, faqat Saudiya Arabistoni terma jamoasi tarkibi to'liq 100 foiz mahalliy futbolchilardan iborat bo'ldi. SHuning o'ziyoq bemalol ko'p tortishuvlarga sabab bo'la oladi. "Al Nasr" klubi prezidenti Musalli Al Muammar bu haqda shunday dedi: "Saudiya Arabistoni Olimpiya o'yinlarida yaxshi futbol ko'rsatdi, biroq natija ijobiy bo'lmadi. Terma jamoa ustozi Saad Al SHehri eng kuchli futbolchilarni yig'a oldi, biroq muammo shundaki, bu futbolchilarning hech biri Evropada o'ynamaydi. Agar biz terma jamoalarimizdan yaxshi natija xohlasak, futbolchilar albatta Evropaga ketishlari kerak".
"Albatta, "Al Nassr" klubi prezidenti gaplarida jon bor. Masalan, Yaponiya termasi safida Takefusa Kubo o'ynayapti. Yoki bo'lmasa Janubiy Koreyada Li Kang In harakat qilyapti. Har ikki futbolchi ham legioner. Li Kang In 2019 yil bo'lib o'tgan U-20 jahon chempionatida musobaqaning eng yaxshi futbolchisi deb topildi va shundan so'ng "Valensiya"ga yo'l oldi. Takefusa Kubo esa "Barselona" akademiyasida tahsil oldi. Mana endi oradan vaqt o'tib har ikki futbolchi pishib etildi va o'z terma jamoalarini muvaffaqiyat sari etaklayapti".
"Umuman olganda, Yaponiya bilan Janubiy Koreyada legionerlar ko'p, futbolchilar yosh paytidayoq Evropaga ketadi, shu bois ham ularning terma jamoasi Olimpiada va jahon chempionatida guruhdan chiqishni uddalay oladi. Saudiya Arabistoni milliy chempionati kuchli, bunga shubha yo'q. Bizning chempionat raqobat borasida bemalol Janubiy Koreya va Yaponiya bilan bellasha oladi. Biroq muammo shundaki, yapon va koreyslar o'sish uchun chetga ketadi, biznikilar esa oxirigacha shu erda qolishadi. Ular Bundesliga, APL, A Seriya va La Ligaga borib rivojlanyapti. Biz uchun esa eng yuqori chegara Saudiya Proligasi bo'lib qolyapti. SHunday ekan, Saudiya Arabistoni futbol federaciyasi bu mavzuda jiddiy bosh qotirmasa bo'lmaydi".
Bosh sahifaga
243