Bekobodning "Metallurg" jamoasi raqiblik qilgan uchrashuvda Bahrom Haydarov shogirdlari bir kishi kam bo'lib 1:0 hisobidagi ustun kelishdi. Ushbu bahsdan so'ng jamoaning etakchisi va sardori Asror G'ofurov saytimizga fikrlarini bildirib o'tdi.
- Dastlab "Metallurg" bilan kechgan o'yin haqida to'xtalsak. Aftidan hammasi durangga qarab ketayotgandek edi. Biroq yakunda bitta gol "Surxon"ga g'alabani tortiq qildi...
- Ko'rgan bo'lsangiz, o'yin tengkurashlar ostida o'tdi. To'g'ri jarayonni olib qaraganda durang ham qayd etilishi mumkin edi. Biroq biz oxirigacha kurashdik. Boisi g'alaba suv va havodek zarur edi. Ikki jamoa ham bitta gol bahs taqdirini hal qilishini bilgandek harakat qildi. Omad esa bizga kulib boqdi.
- "Surxon" raqibning bo'sh xududlarini yaxshi yopa oldi va o'zining hujumlarini tezda tashkil qildi. Nima deb o'ylaysiz, mazkur bellashuvda taktika g'alaba qozondimi yoki futbolchilardagi ishtiyoq?
- O'yinga tayyorgarlik jarayonida murabbiylarimiz taktikani aniq va londa qilib tushuntirishgandi. Ularning ko'rsatmalarini to'g'ri bajarishga harakat qildik va yakunda g'alaba qozondik. Mening fikrimcha, jamoamizda chiziqlar orasida raqobat paydo bo'ldi. Raqobat bor joyda o'sish bo'laveradi. Bu g'alabani juda uzoq kutgandik.
- Jamoa mag'lubiyatlar girdobiga tushib qolgan pallada bitta g'alaba "chuqurlik"dan olib chiqib ketadi. "Metallurg" ustidan qozonilgan g'alaba "Surxon" uchun burilish nuqtasi bo'la oladimi?
- Hamma narsaga doim umid bilan qarash kerak, deb o'ylayman. Hammasi o'z qo'limizda. CHunki maydonda biz to'p tepamiz. Bekoboddagi g'alaba "chuqurlik"dan chiqib ketishimiz uchun ilk qadam bo'lishi mumkin.
- Jamoaga yangi kelgan futbolchilar haqida fikringiz qanday? Deylik shu kuni maydondan chetlatilganingizdan so'ng markazda Javohir Sohibov katta hajmdagi ishni bajardi. Raqib hujumlarini buzishda, o'z jamoasining hujumlarini boshlashda yaxshi harakat qildi...
- Yozgi transferlar oynasi vaqtida tarkibga qo'shib olingan futbolchilarning barchasi yordamga kelgan. Ulardan umidimiz katta. Maqsadimiz esa Superligada o'rnimizni saqlab qolish. Bu mashaqqatli yo'lda yangi kelgan futbolchilar o'z hissalarini qo'shadilar, deb o'ylayman. Javohir Sohibov bilan 7 yil davomida "Paxtakor" akademiyasida birga to'p tepganmiz. Ajoyib futbolchi. Tajribasi katta.
- Turnir jadvalining quyi qismida raqobat kuchliligini ko'rish mumkin. Superligada qolish uchun kurash so'nggi turlarga qadar davom etishini sezish qiyin emas. Ayni paytdagi holatdan kelib chiqib "Surxon"ni safdan chiqarish qay darajada o'rinli?
- Biz hali safdan chiqqanimiz yo'q. Kurash oxirgi turgacha davom etadi. Barchasini vaqt ko'rsatadi. Vaqt oliy hakam. Ertaga nima bo'lishini hech kim bilmaydi. Xudo xohlasa ushbu raqobatda jamoamiz ustun keladi, degan umiddaman.
- "Surxon" tushib ketgan taqdirda ham, barchasini boshidan boshlagan holda, stadioni, bazasini mustahkamlab Superligada yuqori o'rinlar uchun kurashadigan jamoa bo'lib qaytsin, degan fikrlar ham yangramoqda. Siz bunga qanday munosabat bildira olasiz?
- Uy maydoni va bazani Superligada ishtirok etib ham amalga oshirsa bo'ladi. Surxondaryo katta viloyat. Ushbu ishlarni qilishga kuchlari etadi, deb o'ylayman. Har doim biror narsaga erishish uchun vaqt kerak. "Surxon" Superligaga chiqqaniga uch yil bo'ldi. Barchasi sekin-asta bo'ladi.
Abdulaziz Iskandarov suhbatlashdi
Bosh sahifaga
147
