Hamza Karimov hozir qaerda?

 Futbolchilik faoliyati davomida asosan "Mashal" va "Nasaf" klublaridagi yorqin o'yinlari bilan muxlislar qalbidan joy olgan Karimovni so'nggi jamoasi hozircha "Andijon" bo'lib turibdi.  Ishqibozlarga yaxshi malumki,  "burgutlar" 2017 yili PRO-Ligada ishtirok etganida davralar oralig'ida Hamza Karimovni o'z tarkibiga qo'shib olgandi.  Ammo vodiy jamoasida u ko'p faoliyat yuritmadi.  Deyarli mavsum yakuniga etmasidanoq 41 yoshli futbolchi jamoa lagerini tark etdi.  SHundan so'ng Karimovni O'zbekistonningboshqa jamoalarida uchratmadik.  Yaqinda ijtimoiy tarmoq orqali Hamza bilan suhbatlashib,  bugungi kunda nimalar bilan band ekanligini so'radik. 

- Hamza aka, oxirgi yillarda sizni hech bir jamoada ko'rmayapmiz. Buni qanday izohlaysiz? 

- Ha,  shunday.  Hozircha uyda dam olyapman.  

- Yoshingiz ham 40 dan ortdi.  Balki futbolchilik faoliyatingizni yakunlagandirsiz? 

- To'g'ri,  butsalarimni mixga ilganimga ham ancha vaqt bo'ldi.  SHuning uchun ham hozirda futbol o'ynayotganim yo'q. 

- Sizni O'zbekistonda oxirgi marotaba "Andijon" safida o'ynaganingizni yaxshi bilamiz.  Aytishlaricha keyin faoliyatingizni xorijda ham biroz muddat davom ettirgansiz.  SHu rostmi? 

- Yo'q 2017 yili "Andijon"da qisqa vaqt o'ynadim. Keyin to'p tepishni bas qilganman.  

- Odatda futbolchilar butsalarini mixga ilgach,  ushbu tizimda qolib,  murabbiylikni tanlaydi yoki boshqa lavozimda ish yuritadi. Sizda  futbolchilikdan keyingi rejalar qanday? 

- Aytib o'tganimdek,  hozircha hech bir ish bilan shug'ullanayotganim yo'q.  Qarshida,  uyda dam olyapman.  Qolganini vaqt ko'rsatadi. 

- Futbolchilik davringizda muhim o'ringa ega bo'lgan murabbiyingiz Usmon Toshev hozirda "Buxoro"ni boshqarib kelmoqda.  Bu jamoa sizga begona emas. 

- To'g'ri,  oldin "Buxoro"da o'ynaganman. Lekin hozircha klubdan rasmiy taklif bo'lgani yo'q. Telefon raqamimni almashtirib yuborgandim. Extimol shuning uchun meni topisha olmayotgandir. Bunisi menga qorong'u. 

- Balki ushbu maqola saytimizda chiqgach,  Usmon Toshev siz bilan aloqaga chiqar? 

- Extimol shunday bo'lar...

- Kelajakda murabbiylikka o'qish rejangizda bormi?

- Nasib qilsa, licenziya olish uchun o'qirman