Plamen Dimov: "Paxtakor" bilan o'yindan oldin yaxshigina rag'bat vada qilishgandi"

Uchrashuvda Farhod Sohibjonovning yagona goli evaziga hisobda oldinga chiqib olgan maydon egalari qolgan daqiqalarda himoyada ishonchli harakat qilishdi. Joriy yilda markaziy himoyada o'zidan yaxshi taasurot qoldirayotgan bolgariyalik futbolchi Plamen Dimov kecha raqib hujumlarini bartaraf etishda katta hissa qo'shdi. O'yindan so'ng uning fikrlari bilan qiziqdik. 

- Plamen ajoyib g'alaba bilan tabriklaymiz. Darhaqiqat ikki xil saviyadagi jamoalar maydonda to'qnash keldi. Ularning holati ham turlicha edi. SHunday ekan o'yin qanday o'tdi? 

- O'tgan turda "Metallurg"ga alamli tarzda mag'lubiyatga uchragandik. O'shanda g'alabani saqlab qolish nasib qilmagan ekan. SHu bois o'z maydonimizdagi "Paxtakor" bilan o'yinning muhimlik darajasi yuqori edi. Biz Superligada qolish uchun kurashyapmizmi, demak har bir o'yin va qo'lga kiritiladigan ochkoning qiymati o'ta yuqori. O'yinimiz yaxshi chiqmagan bo'lsada, oxirigacha kurashib iroda ko'rsata oldik. "Paxtakor" chempionatning eng kuchli jamoasi hisoblanadi. Murabbiy tomonidan berilgan ko'rsatmalarni to'g'ri bajara oldik. To'g'ri omadsizliklar ham bo'ldi. Buningsiz iloji yo'q. 

- "Paxtakor" so'nggi turlarda "Metallurg" bilan o'yinni hisobga olmaganda juda qiynalmoqda. Uchrashuvlarda bitta to'p farqi bilan yutib ketyapti. Agarda raqiblar o'z imkoniyatlaridan foydalana olsa, bemalol bu jamoani yutib ketishlari mumkin edi. "Andijon"da mana shu jihat o'xshadi, desak to'g'ri bo'ladimi?

- Men bir narsani aytishim mumkinki, "Paxtakor" biz bilan uchrashuvda to'pni yaxshi nazorat qildi.Lekin yuz foizlik yaqqol vaziyatlar yaratgani yo'q. Ularga keskinlik yaratishiga yo'l qo'ymadik, deb o'ylayman. 

- Bunday raqiblar bilan uchrashuvlardan oldin klublar futbolchilarni ruhlantirish maqsadida ko'proq mukofot pullarini elon qilishadi. Deylik birinchi davrada Toshkentda kechgan bahsda so'nggi daqiqalarda durang uchun mukofot puli uch barobar oshirilgani haqida eshitgandik. O'shanda jamoa juda yaxshi qarshilik ko'rsata olgandi. Bu safargi o'yin oldidan ham mukofot pullari bilan motivaciya berildimi?

- Motivaciya futbolchi uchun kerak. SHuni unutmaslik kerakki, biz Superligada kuchlilar safida qolish uchun kurashmoqdamiz. Takidlash joizki, rahbariyat "Paxtakor" bilan bahsdan oldin yaxshigina rag'batlantirish vada qilishgandi. 

- Joriy yilda himoyadagi o'yinlaringiz sabab o'zingizdan yaxshi taassurot qoldirmoqdasiz. Umuman yozda "Andijon"ning bir nechta futbolchilari kuchli klublarga yo'l oldi. Martin Boake AGMKga, Jasur Jaloliddinov "Lokomotiv"ga, Doniyor Abdumannopov Belarus klubiga. Sizda ham bu borada variantlar bo'ldimi?

- Ha yozda bir nechta takliflar bor edi. Ammo vaziyat shunday tus oldiki, men hech qaerga ketmadim. "Andijon" bilan mavsumni yaxshi o'tkazganimdan so'ng o'ylab ko'raman. Hozirda bor etiborim shu jamoaga qaratilgan. O'ylaymanki, birgalikda maqsadimizga erishamiz va jamoani elitada saqlab qolamiz.

Abdulaziz Iskandarov suhbatlashdi