 Nasaf Qarshi | AFC Cup Final Stage . 1/16-tur 22/09/2021, 20:00 0 : 6 Tugadi |  ATK Mohun Bagan FC |
O'z nomiga xet-trikni rasmiylashtirgan 19 yoshli forvard OFK kubogi to'purariga aylanib oldi. Uning hisobida 5 o'yinda urilgan 6 gol bor.
"Mohun Bagan" bilan o'yindan keyin Norchaevning o'yini muhokamalarga sabab bo'ldi. Jurnalist SHahboz Beg'amov esa uni "Nasaf" afsonasi Zafar Xolmurodovga qiyosladi.
Futbolchi, dastlab, 2019 yilgi U-21 chempionatida ko'zga tashlangan. O'shanda 17 yoshli Norchaev Hojimat Erkinov bilan birga turnir to'purariga aylangan.
Iqtidorli o'yinchi Superligada 2020 yilda porlagan edi. U rasmiy debyutini o'tgan yilning iyunida ("Navbahor"ga qarshi, 2:2) nishonlagan. O'sha bahsdan keyin taniqli sport jurnalisti Aziz Nuriy shunday yozgan edi: "Nasaf" yosh iqtidorlarni kashf etishda davom etadi.
O'zbekiston chempionatidagi dastlabki mavsumini Bobir Abdixoliqov bilan raqobat tufayli asosan zaxira o'rindig'ida o'tkazgan Husayn yil oxiriga qadar 3 ta golga mualliflik qildi va "Championat.asia" sayti tomonidan mavsum kashfiyoti sifatida etirof qilindi.
Joriy yil avvalida Abdixoliqov "Nasaf"dan ketgach, Ro'ziqul Berdiev 19 yoshli Husaynni jamoaning asosiy hujumchisiga aylantirdi. Vaqt tajribali mutaxassis adashmaganini ko'rsatmoqda. Norchaev mavsumning ortda qolgan qismida "ajdarlar" libosida 27 o'yin o'tkazib, 18 ta gol urishga ulgurdi.
SHuningdek, Husayn Parij Olimpiadasiga tayyorlanayotgan Timur Kapadze boshchiligidagi terma jamoamizning ham asosiy forvardi hisoblanadi.
Norchaev qayd etayotgan statistika havas qilishga arziydi. Bu o'z tengqurlari orasida Superliganing eng yaxshi futbolchisi bo'lib turibdi. Solishtirish uchun aytamiz, "Lokomotiv" xavbeki Jasur Jaloliddinov hamda "Paxtakor" vingeri Diyor Xolmatovlar mavsum boshidan beri 20 o'yin o'tkazib (barcha turnirlarda), "gol+pas" tizimida 3 ochko ishlashgan. Husaynda esa bu ko'rsatkich 21ga (18+3) teng.
Yuqorida keltirilgan faktlarni inobatga olsak, Norchaev ko'p ehtimol O'zbekiston milliy jamoasining oktyabr oyidagi yig'inida terma libosidagi norasmiy debyutini amalga oshirsa kerak.
Qadrli muxlis, sizning 19 yoshli forvard borasidagi fikringiz qanday? U o'zbek futbolining yaqin kelajakdagi eng kuchli hujumchisi bo'la oladimi?
Engilmas "Nasaf". Berdievning mag'lubiyatsiz seriyasini bilasizmi?
44009219873991931 
Bosh sahifaga
324
12 May 2026, 15:43