Litvadagi Jahon chempionatida terma jamoamiz sharafini himoya qilgan kam sonli tajribali futzalchi Dilshod Rahmatov saytimizga taassurotlari va fikrlari bilan o'rtoqlashdi.
"Ushbu Jahon chempionatidan katta taassurotlar qoldi, deya olaman. To'g'ri men uchun bu birinchisi emas. 2016 yil Kolumbiyadagi mundialda ham ishtirok etgandim. Qaysidir manoda bosim bo'lgandi. Litvadagi musobaqaga juda yaxshi tayyorgarlik bilan bordik. Ispaniya, Portugaliyada kuchli raqiblar bilan o'rtoqlik bahslarida o'ynadik. Associaciya rahbarlari bizga barcha sharoitlarni yaratib berishdi.
Tarkibimizda ajoyib yosh futzalchilarimiz bor. Turnir davomida barchasini ko'zi yonib turdi. Ular bilan birga futzalimiz darajasini ko'rsatib bera oldik. Eron bilan o'yindan so'ng Litvadagi avtobus haydovchilari ham bizni kelib tabrikladi. Bu bizga katta kuch va ishonch berdi. Arzimagan mehnatimizni shunday katta etirof etishgani uchun qo'llab-quvvatlab turgan muxlislarga rahmat aytaman. Orada futzalimiz bir qadam ortga chekingan bo'lsa, ayni paytda ikki emas, uch qadam oldinga qadam tashladik. Hozirgi paytga kelib sharoitlar o'zgardi. Bu tushimizga ham kirmagandi.
Jahon chempionati men uchun so'nggisimi yoki yo'qmi, bilmayman. Avvalo xudo biladi. Kuchim etganicha o'ynayman. Qolganini murabbiylar bilan maslahatlashamiz",- deydi Dilshod Rahmatov.
Bosh sahifaga
192
18 May 2026, 14:02