"Juda ham og'ir o'yin bo'ldi. Kubok doirasida oson uchrashuvning o'zi yo'q. Jamoa oldiga finalga chiqish maqsadi qo'yilgandi va buni uddaladik. SHogirdlarimga minnatdorchilik bildiraman. Qolaversa AGMKni qo'llab-quvvatlab turgan minglab muxlislarimizga tashakkur aytaman. Jamoaga bo'lgan ishonch uchun ishqibozlarga rahmat. AGMK endi finalga tayyorgarlik ko'radi.
O'yinga keladigan bo'lsak, qiziqarli, shiddatli va jangovor futbol bo'ldi. Keskin kurashlarga boy o'yin bo'ldi. Xato qilishga haqqimiz yo'q edi. Bunday darajadagi bellashuvlarda birgina xato ham qimmatga tushishini bilardik. Qolaversa "Nasaf" jamoasi ham ikkinchi taymda bor kuchi bilan harakat qildi. AGMK esa tanaffusdan keyin natijani saqlab qolish uchun harakat qildi va buni uddaladi.
Futbolda avvaldan bashorat qilib bo'lmaydi. Har bir jamoa o'z oldiga maqsad qo'yadi va shunga yarasha intiladi. Qatorasiga uchinchi yil finalga chiqqanimizdan xursandmiz. Bu oson bo'lgani yo'q. Niyatimiz finalda munosib o'ynab, kubokni qo'lga kiritish.
Yo'qotishlar? Mirjamol Qosimov, Sanjar Tursunov va Bobur Yo'ldoshevda jarohat bor. Tursunov finalda ham jamoamizga yordam bera olmaydi. Yo'ldoshev va Mirjamol Qosimov borasida shifokorlar ko'rigidan so'ng barchasi malum bo'ladi. Hozir bir narsa deyish qiyin. Finalgacha vaqt kam. Bugungi o'yinda jarohat olgan futbolchilarimizning holatini esa ertaga bilamiz. Niyat qilamanki, ularda barchasi joyida bo'ladi".
Bosh sahifaga
566