Unda tarixda ilk bor Portugaliya terma jamoasi chempionlikni qo'lga kiritdi.
Litva mezbonlik qilgan mundialning eng yaxshilarini etiboringizga havola etishni lozim topdik.
JCH-2021 "Fairy play" sovrini - Qozog'iston terma jamoasi
Bu sovrin musobaqa davomida delegaciyalarning har bir azosi tomonidan "Fairy play"ga amal qilinishiga bog'liq. Bunda bir terma jamoa maksimal 1000 ochko yig'ishi mumkin. Qo'shnilarimiz esa 931 ochko jamg'arishdi va "Fairy play" sovriniga qo'shib diplom va vaucher (20 ming AQSH dollari)ga ega chiqishdi. Ushbu pullar mamlakatda futzal rivoji uchun ishlatilishi kerak.
Sovrinni Qozog'iston terma jamoasi sardori Igita qabul qilib oldi.
JCH-2021ning eng yaxshi darvozaboni (Oltin qo'lqop) - Nikolas Sarmiento (Argentina)
Argentina terma jamoasi shu yilning 2 va 3 fevral kunlari O'zbekiston terma jamoasi bilan o'rtoqlik o'yinlari o'tkazganda N.Sarmiento Toshkentga kelmagandi. O'shanda bosh murabbiy Matias Lukuiks ayrim legionerlar kelmaganini aytib o'tgandi. Nikolas Ispaniyaning "Palma" klubida o'ynab kelgan, hozir esa boshqa bir ispan klubi "Betis" o'yinchisi hisoblanadi.
Nikolas Sarmiento ushbu JCHda o'z darvozasidan eng kam 8ta gol olib chiqdi va eng yaxshi deb topildi.
Eslatib o'tamiz, Sarmiento 2016 yil Kolumbiyada o'tkazilgan mundialda ham "Oltin qo'lqop"ni qo'lga kiritgandi.
JCH-2021 to'purari (Oltin butsa) - Ferrao (Braziliya), 9ta gol
Dunyoning oxirgi ikki yildagi eng yaxshi futzalchisi Ferrao o'zining birinchi mundialida to'purar bo'lishni uddaladi. Har ikki oyoqda zarba bera oladigan "Barselona" o'yinchisi Litvada 9ta gol urdi. Bundan tashqari, Ferrao ikkita golli pas ham berdi.
Mundialning "Kumush butsa"si Portugaliya terma jamoasi hujumchisi Paniga topshirildi. Pani finaldagi dubli evaziga o'z gollari sonini 8taga etkazib oldi. Uning hisobida bitta golli pas ham bor.
"Bronza butsa" esa Qozog'iston terma jamoasi azosi Taynanga topshirildi. Asli braziliyalik bo'lgan futzalchi jami 6ta gol urdi. Ispaniyalik Adolfo Fernandez ham 6ta to'p kiritdi. Musobaqa reglamentiga ko'ra, bunday holatda o'yinchilar bergan golli paslarga qaraladi. Fernandez ikkita, Taynan esa uchta goli pas berdi. SHu sabab, "Bronza butsa" qo'shnilarimiz azosiga topshirildi.
JCH-2021ning eng yaxshi o'yinchisi (Oltin to'p) - Rikardino (Portugaliya)
Futzal tarixidagi eng buyuk o'yinchilardan biri Rikardino ushbu mundialda ikkita gol urdi va ettita golli pas berdi (2+7). Portugaliyalik "sehrgar" garchi 6 karra dunyoning eng yaxshi o'yinchisi hisoblansada, biror marta JCHlarda "Oltin to'p"ni qo'lga kiritmagandi. Litvada esa Rikardino bosh sovringa qo'shib "Oltin to'p"ni ham qo'lga kiritdi. Afsonaviy o'yinchining xalqaro faoliyati uchun yorqin xotima.
Mundialning "Kumush to'p"i Portugaliyaning boshqa bir futzalchisi Paniga topshirildi. 32 yoshli o'yinchi pley-offning har bir bosqichida jamoasi uchun gol urishni uddasidan chiqdi, finalda esa har ikkala golga mualliflik qildi hamda haqli tarzda "Silver ball"ni o'ziniki qildi.
Musobaqaning "Bronza to'p"i Qozog'iston terma jamoasi himoyachisi Duglasga topshirildi. Duglas JCHda 4ta gol urdi va 5ta golli pas berdi. Bundan tashqari, 31 yoshli o'yinchi mundialda eng ko'p kurashlarni yutdi, hammadan ko'p pas berdi va Litvada barcha o'yinchilardan ko'ra ko'proq daqiqa o'ynadi.
Bosh sahifaga
102
