Murosasiz va shiddatli o'tgan o'tish o'yinidan so'ng "Andijon" futbolchisi Farhod Bekmurotovni suhbatga chorladik.
- "Andijon"ning Superligada qolgani bilan samimiy tabriklaymiz. "Neftchi" bilan o'yin sizlar uchun oxirgi chora edi. Jamoa Superligada og'ir mavsum o'tkazganiga qaramay qisqa vaqtda mazkur uchrashuvga qadar tiklana oldi va g'alaba qozonib elitada qoldi...
- Tabrik uchun katta rahmat. "Neftchi" bilan o'ynab Superligada qolish taqdirimizga yozilgan ekan biz nima ham qila olardik. Mavsumdagi oxirgi o'yinga jiddiy tayyorgarlik ko'rgandik. 0:1 hisobida ortda borayotganimizda ham yutishimizga ishondim. Rahbarlar, muxlislar, oila azolarimiz va yaqinlarimiz oldida yuzimiz yorug' bo'ldi.
- Bu faoliyatingizdagi eng og'ir va murakkab mavsummi?
- Ha, shunday desak ham mubolag'a bo'lmaydi. Pandemiya sabab ko'p uzilishlar va tanaffuslar yuzaga keldi. Qiyin mavsumni o'tkazdik.
- Jamoani mavsum davomida to'rt nafar murabbiy boshqarishga ulgurdi. Lekin yakunda Otabek G'ulomxo'jaev jamoani Superligada olib qolish vazifasini uddaladi. Bunda futbolchilarga qay darajada qiyin bo'ldi? To'rtta murabbiy, to'rt xil qarash, to'rt xil uslub va falsafa...
- To'g'ri takidladingiz. Qiynlaganimiz rost. Endi bir murabbiyning uslubiga moslashganimizda boshqasi keldi. Har bir murabbiyning o'ziga yarasha qarashlari, falsafasi, tushunchasi bor. SHu tomondan ham qiynaldik deya olaman.
- "Andijon" joriy mavsumda juda ham kam gol urdi. Bu nima bilan bog'liq?
- Hujumchilarimizga omad etishmadi deb o'ylayman. O'yinlarda juda ko'p imkoniyatlarga ega bo'ldik, vaziyatlar yaratdik. Lekin oxirgi nuqtani qo'yish nasib qilmadi. Hujumlarni yakunlashda oqsadik. Agar yaratgan vaziyatlarimizdan samara chiqara olganimizda gollarimiz soni bundan ham ko'p bo'lardi.
- Klub ikki mavsum Superligada qolish uchun kurashdi. Hozirda etibor oshgani va moliyaviy holat yaxshilanganini hisobga olsak navbatdagi mavsumda muxlislar qanday natija kutishlari mumkin?
- O'tgan yili bunchalik qiyin bo'lmagan edi. Turnir jadvalida o'ninchi pog'onani egallagandik, boz ustiga avvalgi mavsumda tajribali futbolchilar ham nisbatan ko'p bo'lganini aytish joiz. Bu yil esa ko'proq yoshlarga ishonch bildirildi. Ha, etibor va moliyaviy holat yaxshi bo'lib tursa keyingi mavsum yuqori o'rinlardan birini egallaymiz.
- "Paxtakor" bilan kechgan bahsda jarohat olib maydonni tark etgan edingiz. "Neftchi"ga qarshi uchrashuvga qanday tiklandingiz?
- Ha, Toshkentdagi o'yinda jarohat orttirib oldim. Ko'rdingiz, "Nasaf" bilan kubok uchrashuvida ishtirok etmadim. O'tish o'yiniga ikki kun qolganda mashg'ulotlarga qo'shildim. Murabbiylarimiz taktikalar ustida ish olib borishdi. Otabek aka o'yindan oldin oldilariga chaqirdilar va jamoaga yordam berishim kerakligini tushuntirdilar. "Neftchi" bilan og'riq qoldiruvchi ukol bilan o'ynadim.
- Mag'lubiyatlar, xato va kamchiliklar jamoaga saboq bo'ldimi? To'g'ri xulosa chiqarildimi?
- Ha, mag'lubiyatlar kamchiliklarimizni ko'rsatib berdi. Har qanday xatodan to'g'ri xulosa chiqarish muhim. Murabbiylarimiz mashg'ulotlarda qaerda qanday xato qilganimizni ko'rsatib berishdi.
- Otabek G'ulomxo'jaev qisqa vaqt ichida jamoada qanday o'zgarishlarga qo'l urdi?
- To'g'risi, "Surxon"ga mag'lub bo'lganimizdan so'ng jamoadagi ko'pchilik tushkun holatida edi, Pro ligaga tushib ketish havfi oshgandi. Lekin, Otabek aka o'z kuchimizga bo'lgan ishonchni qaytara oldi. O'z maydonimizda "Mashal"ni mag'lub etdik va bu g'alaba bizga o'tish o'yinida ishtirok etishimizni taminladi. Eng yaqin taqibchimiz "Buxoro" esa mag'lubiyatga uchradi. Muxlislarimizga oxirigacha qo'llab-quvvatlagani uchun minnatdorchilik bildirib qolaman.
Abdulaziz Iskandarov suhbatlashdi.
Bosh sahifaga
462