Futzal. "Lokomotiv" - "Bunyodkor" uchrashuvidan so'ng murabbiylar fikrlari

Musobaqaning ochilish o'yinida Toshkent shahring ikki jamoasi "Lokomotiv" va "Bunyodkor" klublari o'zaro to'qnash keldilar va uchrashuvda temiryo'lchilar 4:1 hisobida g'alabaga erishdilar. 

Quyida o'yin yakunida har ikki jamoa murabbiylari tomonidan bildirilgan fikrlar etiboringizga havola etiladi.

Farhod Mirahmedov ("Lokomotiv" murabbiyi) - Yangi mavsumdagi birinchi uchrashuvda ishtirok etdik. Yangi to'plar berildi. Qolaversa bu parketda to'p yurishi qiyin kechdi. Nafaqat biz, raqib ham qiynaldi. To'pni oshirishda muammolar yuzaga keldi. Futzal chempionatimizda yaxshi jamoalar ko'paydi. "Bunyodkor" tarkibidagi yoshlar ancha o'sishga erishdi. Bizning tarkibimizda terma jamoa futbolchilari bo'lishiga qaramasdan, raqib munosib qarshilik ko'rsata oldi.

Abdulla Bo'riev ( "Bunyodkor" bosh murabbiyi") - Avvalombor barcha futzal muxlislarini mavsumning ochilish uchrashuvi bilan tabriklayman. O'ylaymanki, chempionatimiz bu yil ancha qiziqarli va shiddatli ruhda o'tadi. Ko'p jamoalar deyarli bir xil darajada, desam mubolag'a bo'lmaydi. Mavsumga tayyorgarlikni avgust oyidan boshladik. Tayyorgarlikni yaxshi olib bordik. O'rtoqlik uchrashuvlari o'tkazildi. Bugun mavsumdagi ilk o'yinimiz edi. Yigitlar biroz qiynalishdi. Umuman olganda bir xil o'yin bo'ldi. Imkoniyatlaridan foydalangan jamoa g'alaba qozondi. Keyingi o'yinlarda bugungi xato va kamchiliklarni bartaraf etib ijobiy natija ko'rsatishga harakat qilamiz.