Uchrashuv 1:1 hisobida yakunlandi. Mazkur bahsdan so'ng “Surxon” futbolchisi Islom Toshpo'latov fikrlariga quloq tutdik.
- Qiziqarli o'yin bo'ldi, - deya gap boshladi Toshpo'latov. CHunki har ikki jamoaga ham g'alaba juda zarur edi. Dastlabki golni urib olganimizdan so'ng “Turon” ko'proq hujum tashkil qilishga urindi. SHuning oqibatida standard vaziyatda o'z darvozamizdan to'p olib chiqdik. Umuman olganda, stadionga yig'ilgan muxlislar chiroyli va murosasiz o'yin guvohiga aylanishdi.
Superligada qolish imkoniyati xususida
- Bizda Superligada qolish imkoniyati ancha yuqori. Oldimizda turgan o'yinlarda o'zimiz uchun kerakli natijalarni qayd eta olsak, maqsadimizga erisha olamiz. Bundan tashqari, o'z maydonimizda o'tkazadigan bahslarda Superligada qolishimizni kafolatlaydigan ochkolarni ishlab olishga urinamiz.
Bu mavsum borasida
- Barqaror o'yin ko'rsata olmayotganimizga ochig'i o'zimiz ham tushunmayapmiz. Bizda ajoyib murabbiylar shtabi mehnat qilmoqda. Futbolchilar ham mashg'ulotlarda tinimisiz harakat qilib, jamoaviy o'yin darajasini oshirish ustida izlanmoqdamiz. O'ylashimcha, omad etishmasligi tufayli muhim o'yinlarda g'alaba qozona olmayapmiz.
Joriy yildagi faoliyati to'g'risida
- Kichik jarohatlar ko'p bo'ldi. Agar ularni hisobga olmaganda, Superligada o'ynab, ancha tajriba oshirdim. Bu esa menga kelgusi mavsumlarda menga juda asqotadi.
“Neftchi”ning Superligaga qaytishi haqida
- Albatta, bundan juda xursand bo'ldim. “Neftchi” Superligada to'p tepishga loyiq jamoa. Hozircha “Surxon” tarkibidaman. “Neftchi”dan kelgusida taklif bo'lishi xususida o'ylab ko'rganimcha yo'q. Mavsum yakuniga etganidan so'ng bu haqda o'ylab ko'rish mumkin.
Bosh sahifaga
74
