Kuchli shamol va yomg'ir ostida kechgan uchrashuvda olmaliqliklar g'alabani tantana qildi. Mazkur bahsdan so'ng AGMK darvozaboni Valijon Rahimov fikrlari bilan o'rtoqlashdi.
- "Metallurg" bilan o'yin haqida...
- Avvalambor assalomu alaykum. Bekobodda o'tgan Toshkent viloyati derbisida havo noqulay bo'lishiga qaramasdan maydonda haqiqiy jang kechdi. Azaldan bu ikki jamoa o'rtasidagi to'qnashuvlar murosasiz va qiziqarli bo'lgan. "Metallurg" yaxshi jamoa. Ularga keyingi bahslarda omad tilayman.
- AGMK tarixni yangilay oladimi?
- Ha, xudo xohlasa o'tgan yilgi natijani yangilash uchun harakat qilamiz. Hozirga kelib ikkinchi o'rin uchun uchta jamoa o'rtasidagi kurash qizg'in pallaga kirdi.
- Joriy yilgi mavsum jamoa uchun qanday o'tmoqda?
- Jamoamiz bu yilgi mavsumda yaxshi qatnashmoqda, deb o'ylayman. O'zbekiston chempionati va xalqaro maydonda katta tajriba to'pladik. "Al Garafa"ga qarshi pley-off uchrashuvi yoddan chiqmaydigan bo'ldi. Bu o'yindagi g'alaba bizga OCHL guruh bosqichiga yo'llanma berdi. Ilk bor bu ishni uddasidan chiqa oldik.
- Oldinda terma jamoamizni Gruziyaga qarshi o'rtoqlik uchrashuvi kutmoqda. Srechko Katanec boshchiligidagi ikkita yig'inda ishtirok etdingiz. Uning talablari qanday?
- Srechko Katanec birinchi navbatda tartib-intizom bo'lishini talab qilmoqda. Maydonda va uning tashqarisida ham. O'rtoqlik uchrashuvlariga jiddiy qarashimiz kerakligini, har bir bahsga oxirgi marotaba chiqqandek yondashishimizni istamoqda. Tezkor paslar bilan oldinga o'tishimizni tushuntirmoqda.
Abdulaziz Iskandarov yozib oldi
Bosh sahifaga
277
27 Iyun 2026, 19:30