Ro'ziqul Berdiev: "Hakam "Andijon"ning g'alabasiga harakat qilishini sezib turgandim. Bunday maydonda bizning futbolni o'ynab bo'lmaydi"

"Biz bugun raqib bilan ham, maydon bilan ham kurashdik. Yigitlarga asosiy bergan ko'rsatmamiz kurashni boy bermaslik edi. "Andijon" ko'proq standartlarga etibor qaratadi. Bunday vaziyatlarda etiborliroq bo'lishimiz kerak edi. Afsuski birinchi golni aynan standartdan o'tkazib yubordik. 1:1 bo'layotgan pallada ham ko'rdinglar ikkita qulay imkoniyat yuzaga keldi. Golli vaziyatimizda hakam nima uchun bunday qaror qabul qildi, tushunmadik. Lekin toza golimizdan mahrum qilishdi. Uchrashuv hakami "Andijon" jamoasining g'alabasi uchun ko'p harakat qilishini sezib turgandim. Buni amalda ham ko'rdinglar. Birinchidan haqqoniy golni inobatga olgani yo'q, ikkinchidan penalti yo'q edi. Usmonaliev emas, keyingi o'yinchi o'yindan tashqari holatda qolgandi. Nima uchundir yana qaytadan teptirdi. Bu hakamlarning vijdoniga havola",- deydi Ro'ziqul Berdiev. 

- Aziz Asimov "Andijon"ning g'alabasiga harakat qildi, dedingiz. Agar shunday bo'lganida mezbonlar darvozasiga penalti qo'yilmagan bo'lardi...

- Aziz oldimga kelganida bor narsani hakamlik qilishini aytdim. Uni haqorat qilganim yo'q. Penalti bo'lsa ber, gol bo'lsa hisobla. Golimizni bekor qilganidan so'ng o'zimning fikrimni bildirdim. Biz yordam so'ramayapmiz, penaltini bekor qil, demayapmiz. Toza golni bekor qilganda qanday qilib norozilik bildirmaslik mumkin. Hakamdan boshqa narsa talab qilayotganimiz yo'q. O'yinning oxirigacha nimadir bo'lishini sezgan edim. Futbolchilarimning o'zlari bugun yuta olmasliklarini aytishdi. SHuning uchun o'yinni to'xtatmoqchi bo'ldik. Balki bu narsa kerak bo'lgandir. 

- "Nasaf" jamoasini butun O'zbekiston yaxshi ko'radi. Kerak bo'lsa, xalq jamoasi nomini "Paxtakor"dan tortib oldi. Xalqaro musobaqada ham barcha muxlislik qilmoqda. Bitta vaziyat uchun o'yinni to'xtatib, minglab muxlislar oldida jamoangizni olib chiqib ketmoqchi bo'ldingiz...

- Siz bizni muhokama qilmang. Xalq mehrini o'z mehnatimiz, siyosatimiz, o'yinimiz bilan qozondik. Bizga mehrni hech kim berib qo'ymadi. O'zimizning bunday tutishimiz sababini isboti bilan aytib berdim. Bunga chidash qiyin. 

- "Nasaf" futbolchilari bugun finalni o'ylagan holda o'ynadimi?

- Finalgacha ancha bor. Biz buni o'ylamadik. Qolaversa kubok bahsi kutib turibdi. Ayrim futbolchilarda charchoq alomati borligi uchun dam berishga qaror qildik. Oldimizda o'rin egallash maqsadi turibdi. CHarchoq bo'lsa ham maksimal o'ynashga harakat qildik. Bunday maydonda bizning futbolni o'ynab bo'lmaydi. Bahona qilmoqchi emasman. 

- Dastlab Sekeyra, keyin esa Piter Xyuistra maydonlar, o'zbek futboli o'lyapti, degan fikrlarni eshitmoqdamiz. Siz mahalliy murabbiy sifatida qanday qaraysiz? 

- To'g'risi kecha maydon holatini ko'rib achindim. Maydon yangilanganda birinchi kelib o'ynagandik. Ikki yil ichida bunday holatga tushib qolgani achinarli. SHaroitlarni to'g'irlatishimiz kerak. Sekeyra yoki Xyuistraning gaplarini muhokama qilmayman. Lekin kimdir qaerdadir xato gapirgandek tuyuldi . SHaroitlarni gapirishgani yaxshi. Lekin misol keltirish noo'rin.