Unda Oliy Liga 19-turi doirasida o'tgan "Qizilqum-W" va "Navbahor-W" o'yini (2:1) atrofidagi fikrlar aks etgan. Takidlanishicha, Namangandan Navoiyga safar qilgan "lochinlar"ning ayollar jamoasiga etarli sharoitlar yaratib berilmagan va Karima Yo'ldosheva shogirdlari yo'lda ancha qiynalib qolishgan. Bu masalaga oydinlik kiritish maqsadida saytimiz jurnalisti Malika Kushbakova "Navbahor-W" futbolchisidan fikr oldi.
"Professional futbolda jamoa safar o'yinlariga 1 kun oldin borib, dam olishi, ob-u havoga moslashganidan keyin maydonga chiqishi kerak. Biz esa o'yin kuni saharda yo'lga tushdik. Taksida 12-13 soat yurib, Navoiyga etib bordik va oyoqlarimiz shishgan holatida darhol maydonga tushdik. Yo'lning o'zi bor kuchimizni olib qo'ygandi. (24 oktyabrda "Paxtakor" maydonida o'tgan o'yin ham xuddi shunday bo'ldi)
Mayli, amallab 90 daqiqani o'tkazdik. Uchrashuv tugaganidan keyin tez-tez kiyim almashtirib, yana yo'lga otlandik. To'g'risi, bu juda ham qiyin. 13 soat yo'lda yurasiz, o'yindan keyin tunda yana 13 soat yurib uyga qaytishimiz kerak. Tushuning, biz qiz bolamiz, ayollarmiz! Ota-onalarimiz bor. Kechqurun yo'lga chiqyapmiz. Ular bizdan xavotirlanishmaydimi?
Erkaklar futbolida bunday bo'lishini tasavvur qilolasizmi? To'g'ri, Superliga bu — Superliga, ularga berilgan etiborni talab qilolmaymiz. Lekin bizga ham ozgina sharoit berilishini so'ragan bo'lardim. Qaytaraman, biz qizlarmiz va bunday mug'itga munosibmasmiz.
Nega "Sevinch", "So'g'diyona" yoki "Bunyodkor"ning ayollar jamoasi yaxshi natija ko'rsatadi, deb o'ylaysiz? CHunki ularga etibor juda ham kuchli. O'zim "qaldirg'ochlar" safida o'ynaganman. Ko'z tegmasin, "Bunyodkor"da sharoitlar ancha yaxshi: safar o'yiniga 1 kun oldin boradi, eb-ichish, yurish-turish, hamma narsasi joy-joyida...
"Qizilqum-W" safari haqida gapirsam, 1 va 2-ovqat yo'q. Ulardan birini tanladik. Ko'cha mashinasida bordik. 1 lasettiga 4 qizni joylashtirishdi. Har doim shunday bo'ladi. Hech bo'lmsa, 3 tadan futbolchi 1 mashinaga chiqarilganida ham orqadagi qizlar bemalol ketishi mumkin. Tasavvur qilyapsizmi? 13 soat siqilib borasiz va 90 daqiqa futbol o'ynashingiz kerak.
Maosh borasida ham maqtanolmaymiz. Uydagilarim doim aytishadi: oyog'ing, qo'lingda doim jarohat, kechalari yo'lda yurasan, topayotgan puling bunga arzimaydi. Bu gaplarim bilan "Navbahor"ni kamsitmoqchi emasman. Lekin, ayollar jamoasiga etibor juda ham sust. Ovqatlanish tomonlama ham, maosh borasida ham. "Metallurg"da ham, "Bunyodkor"da ham o'ynaganman. Namangandagi sharoit ularning 1 foiziga ham etmaydi. Ayollar futbolida faqat "Navbahor"da "premiya" yo'q. Oxirgi o'rinlarda yurgan "Nurafshon"da ham, "Qizilqum"da ham mukofot puli bor, bizda yo'q. Buni qo'ya turing, 2-3 oylab maosh olmagan paytlarimiz bo'ldi, juda qiynaldik. Axir tushuninglar, ayol kishi uchun bu juda qiyin", — dedi "Navbahor"ning 2002 yilda tug'ilgan hujumchisi Tojinisoxon Rashidova (u ayni paytda O'zbekiston YTJ azosi ham).
SHundan keyin saytimiz jurnalisti Faxriddin Ro'ziev "Navbahor"ga yaqin manbalardan bu borada malumot oldi. Takidlanishicha, ayollar jamoasining safar o'yinlarida har bir qizning ovqatlanishi uchun 60 ming so'mdan ajratiladi. SHu o'rinda "Navbahor"ning asosiy jamoasiga beriladigan etiborga qarang: Belenkovga necha milliard tovon puli to'langaniyu Andrey Antanasovich talab qilayotgan raqamlarni eslang...
Xafsalasi pir bo'lgan muallif bu holatga shaxsiy munosabatini bildirishdan uyaldi va OAV bilan munosabatlarda "ekstra" darajada faol "Navbahor" matbuot xizmatidan izoh kutadi. Xulosa o'zingizdan!
F. Ro'ziev, M. Kushbakova
Janjal, penalti, qahramon — chorak finalning qiziqarli raqamlari
Bosh sahifaga
371
9 Iyul 2026, 08:39