"Kristal Pelas" APLning o'rtamiyona klubi biri hisoblanadi. CHempionlik uchun kurashmaydi va bazan quyi ligaga tushib ketmaslik uchun harakat qiladi. Bu klubda 2015 yildan buyon to'p tepib kelayotgan kot-d'ivuarlik futbolchi bor. Bu - Vilfrid Zaxa. Kimdir Zaa deydi, kimdir Zaxa. Xullas men uchun Zaxa.
Men "Kristal" o'yinlarini faqat shu futbolchi uchun ko'raman. CHunki Zaxa juda iqtidorli futbolchi, raqiblarini qo'rqmay aldaydi, gollar uradi, qiyin vaziyatdan jamoasini olib chiqib ketishni biladi, bir so'z bilan aytganda etakchi. Kecha ham birinchi gol urishdan tashqari, ikkinchi golda ham ishtirok etdi va "Siti" himoyachisi Lyaportning "qizil" olishiga sabab bo'ldi.
Zaxa 28 yoshda (1992 yil tug'ilgan). U faoliyati davomida ko'plab sovrinlarni qo'lga kiritmagan, axir "Kristal Pelas"da o'ynab nimaniyam yutish mumkin. 11-raqam egasi faqat 2013 yil "Manchester Yunayted" bilan Angliya Superkubogini yutgan. SHuningdek, 2012-2013 yilgi mavsum CHempionshipda "Yil futbolchisi" bo'lgan.
U dastlab Angliya terma jamoasida o'ynagan va faqat 2ta uchrashuvda maydonga tushgan. 2017 yildan beri vatani Kot-D'Ivuar milliy terma jamoasi sharafini himoya qilib kelyapti. Hozirgacha milliy jamoa safida 21 bellashuvda ishtirok etib, 5ta gol urgan.
Gap bunda ham emas. Gap uning 2015 yildan beri o'ynab kelayotgan "Kristal Pelas"ga bo'lgan sadoqatida va boshqa klubga o'tib ketmaganida. Zaxa kuchli futbolchi, u hozir ham "CHelsi", "Yunayted", "Siti", "Liverpul", "Arsenal" kabi grandlarda bemalol o'ynab keta oladi. U APLni yaxshi biladi va yaxshi ko'radi, axir faoliyati davomida faqat Angliyada o'ynab kelyapti.
Yuqori divizionlarda 14, 16, 18, 20 jamoa kurash olib bormasin, chempion faqat bitta bo'ladi. Lekin "Zaxa"si bor klublarga chempion bo'lmasa ham havas bilan qarasa arziydi. CHunki shunday futbolchining bir o'zi muxlislar etiborini qozona oladi. Masalan, o'zim ham faqat shu futbolchi uchun "Kristal Pelas" o'yinlarini ko'raman.
Endi bizning Superligani olaylik. Agar kuchli klublar, yani chempionlikka harakat qiladigan jamoalar doim eng kuchli futbolchilarni o'z safiga qo'shib olaversa, bu bilan Superliga zo'r bo'lib qolmaydi. Baribir qolgan jamoalarda o'z "Zaxa"lari qolishi kerak. Avvalo qolgan klublarda "Zaxa"lar bormi degan savol yuzaga keladi.
Masalan, Superligada o'z "Zaxa"siga ega deb qaysi jamoalarni ko'rsata olasiz? Qaysi klubda qiyin vaziyatda jamoasiga yordam bera oladigan, gollar uradigan va etakchilikni o'z qo'liga ola biladigan futbolchi bor? Agar bor bo'lsa, biz ularni hurmat qilamiz va Zaxa kabi sadoqatli bo'lishlarini tilab qolamiz. Mabodo yo'q bo'lsa, unda har bir murabbiy o'z jamoasi uchun "Zaxa"ni tarbiyalab berishiga to'g'ri keladi.
Vilfrid Zaxa yana qancha yil faoliyat olib borsa ham chempion bo'ladimi, ECHLni yutadimi - bir narsa deyish qiyin. Lekin shunisi aniqki, u o'z klubi muxlislari hurmatini qozonib bo'lgan. Unda medal yo'q, ammo medaldan ham ustun "Kristal Pelas" ishonchi bor, ishqibozlar daldasi bor. Bu esa eng muhimi.
SHunday davr bo'lsinki, biz ham o'z "Zaxa"si bo'lgani uchun Superligani qoldirmay kuzatsak. Bunda o'yinlarni markaziy deb ajratishga hojat qolmaydi. Siz "Zaxa" uchun futbol ko'rasiz, bugun kim yutarkin deb emas, "Zaxa" nima qilarkin deb o'yinga oshiqasiz. SHunda Siz kim o'ynasa farqi yo'q, men klubga muxlisman demaysiz, mening jamoamda "Zaxa" bor, men shu futbolchining ishqiboziman deb baralla ayta olasiz.
Bosh sahifaga
803
11 Iyul 2026, 08:55