Bilasiz, yuqori to'rtlik jamoalari Superligaga chiqish uchun kurash olib boradilar, aniq maqsad qo'yilgan. Yuqori to'rtlikdan hozirga qadar Farg'onaning "Neftchi" va Samarqandning "Dinamo" klublari muddatidan avval elita yo'llanmasini qo'lga kiritishdi. Superliganing 12-jamoasi bilan o'tish o'yinida maydonga tushish huquqini beruvchi 3-o'rin egasi esa so'nggi turlarda hal bo'ladi. Bu yo'llanmaga Toshkentning "Olimpik" va Buxoroning "Nurafshon" jamoalaridan biri ega chiqadi.
Quyi to'rtlikda esa vaziyat boshqacharoq. Dastlab 10 ta jamoa bilan boshlangan Pro ligada ayni damda 8 ta jamoa qolgan, "Istiqlol" va "Oq-tepa" malum sabablarga ko'ra musobaqani tark etishdi. Aslida quyi to'rtlik jamoalari Pro ligada qolish uchun kurashishlari shart edi. Ikki jamoa chempionatdagi ishtirokini to'xtatganidan so'ng Pro ligani hech bir jamoa tark etmaydigan bo'ldi. Vaziyat borasida hech kimni ayblash niyatimiz yo'q, lekin quyi to'rtlik jamoalari ishtirokidagi o'yinlarda aniq maqsad yo'qolib qolgandek. Mayli, futbolchilarga o'yin amaliyoti uchun sharoit yaratib beraylik, murabbiylar shu kabi xotirjam ruhda o'tadigan uchrashuvlarda turli taktik uslublarni sinovdan o'tkazib olsin. Har holda maqsad shu kabi omillar asosida tashkil etilsa, maqsadga muvofiq.
Bugun Pro liganing quyi to'rtlik jamoalari o'rtasida 24-tur uchrashuvlari bo'lib o'tdi. Urganchda "Xorazm" G'uzorning "SHo'rtan" klubini qabul qilgan bo'lsa, "Yangier" o'z maydonida "Aral Samali" bilan kuch sinashdi. Tahririyatimizga etib kelgan malumotga ko'ra, Yangierda bo'lib o'tgan o'yin avvalida uchrashuvni stadionda tomosha qilish maqsadida kelgan muxlislar tashqarida qolib ketishgan. Aniq faktlarga tayanadigan bo'lsak, uchrashuvga kirish uchun chiptalar sotuvi yo'lga qo'yilgan va stadion kassasi o'yin boshlanishiga atigi 5 daqiqa qolganida ochilgan. Bunday vaziyatda tabiiy xolda kassa oldida turnaqator navbat yuzaga keladi, tom-manoda aytadigan bo'lsak, "ur-yiqit" holati sodir bo'ladi. Bazi jamoalar stadionlarga kirishni bepul qilib qo'yib ham muxlis to'play olmayotgan vaqtda "Yangier" klubi mutasaddilarining bu ishlari hayratlanarli.
Umid qilamizki, klub mutasaddilarining mazkur holat bo'yicha o'rinli sabablari bo'lgan va kelgusida takrorlanmaydi. CHunki ayrim yosh muxlislar bilmasligi mumkin, "Yangier-Quruvchi" jamoasi o'ziga yarasha shonli tarixi bor bo'lgan nomdor klub. Mos ravishda jamoa qaysi ligada ishtirok etsa ham o'yinlarini tomosha qilish uchun keladigan muxlislari hamisha topiladi.
Bekzod Tolibov
44009219873991931 
Bosh sahifaga
391
11 Iyul 2026, 13:03