Jahongir Jiyamurodov: "Barqarorlik "Nasaf"ning asosiy quroli"

Jumladan, Qarshining «Nasaf» jamoasi OFK kubogi finalida Bahraynda «Al-Muharraq» klubi bilan kuch sinashadi. Etiborlisi, OFK kubogi finali – «ajdarlar»  uchun begona musobaqa emas. Jumladan, qarshiliklar bundan  10 yil oldin – 2011 yilning 29 oktyabr kuni OFK kubogi finalida «Kuvayt SK» jamoasini mag'lub (2:1) etib, xalqaro maydondagi ilk sovringa ega chiqishgandi. 

Mazkur uchrashuvda harakat qilgan mahoratli himoyachi Jahongir Jiyamurodov ham «Nasaf»ning g'alabasiga munosib hissa qo'shgandi. Takidlash joizki, Jahongir futbolchilik faoliyatidagi eng yorqin lahzalarni aynan «Nasaf»da o'tkazganini muxlislar yaxshi eslshadi. 

«Ajdarlar»ning sobiq azosi bo'lajak muhim bahs oldidan o'z fikrlarini bildirib o'tdi: - «Nasaf»ning tarixiy muvaffaqiyatiga o'z ulushimni qo'shganimdan bag'oyat mamnunman. O'shanda, yigitlar bilan hamjihatlikda harakat qilib, OFK Kubogi sohibiga aylangandik. Mana oradan 10 yil o'tib, «ajdarlar» yana bir bor finalda maydonga tushishadi. Bugungi «Nasaf»ning tarkibi keskin yoshargan. Ammo, jamoada barqarorlik yo'qolmagan. 

Yani, qarshiliklar milliy chempionatda doimiy ravishda sovrinli o'rinlar uchun kurash olib bormoqda. O'zbekistonning nomdor klublariga har tomonlama munosib qarshilik ko'rsatib kelishayotgani tahsinga loyiq, albatta. Vohada futbol infratuzilmasining yaxshi yo'lga qo'yilgani bois juda ko'plab istedod egalari voyaga etishyapti.  O'zbekiston o'smirlar, yoshlar, olimpiya terma jamoalari tarkiblariga «Nasaf»  futbol akademiyasining juda ko'plab tarbiyalanuvchilari ham jalb etilayotgani ham yuqoridagi fikrimni isbotlaydi. 

Demoqchimanki, «Nasaf» futbol akademiyasi nafaqat yurtimizda balki Osiyo miqyosida ham etakchi futbol talimi maskanlaridan sanaladi. «Nasaf»  futbol akademiyasida yosh futbolchilar uchun barcha zarur shart-sharoitlar yaratib berilgan. Respublikamizning barcha mintaqasida «Nasaf» akademiyasidek futbol maktablari tashkil etilsa maqsadga muvofiq bo'lardi. Bahraynda yosh «ajdarlar»ni jiddiy sinov kutib turibdi. «Al-Muharraq» esa bir qator tajribali futbolchilarga ega. 

O'ylaymanki, Ro'ziqul Berdiev shogirdlari klubning azaliy ananalarini davom ettirgan holda yorug' yuz bilan vatanimizga qaytishadi. Tarkib va o'yindagi barqarorlik «Nasaf»ning asosiy quroli deb, hisoblayman.