Farg'onaning “Neftchi” klubi 2-turda ikki g'alaba va 1 mag'lubiyat qayd etdi. Xo'sh, bu yil Oliy ligada debyut mavsumini o'tkazayotgan “Neftchi” qanday maqsadlarni rejalashtirgan. Bu haqda bosh murabbiyi Farruh Zokirov fikrlariga quloq tutdik.
“Farg'onada o'tkazilgan birinchi turda kamida 6 ochko olishimni maqsad qilgandik. Afsuski, bunga erisha olmadik. Ikkinchi turda esa 6 ochko to'play oldik va qo'yilgan vazifani bajarishning uddasidan chiqdik.
- Sizningcha, ikkinchi turda “Neftchi” uchun qaysi jamoaga qarshi bahs qiyin kechdi?
- Menimcha, “Paxtakor” bilan kechgan birinchi o'yin biz uchun qiyin kechdi. Sababi shu kuni bizda ham ko'p vaziyatlar yuzaga keldi. SHogirdlarim esa bulardan foydalana olmadi. Baribir “Paxtakor”ning amaldagi chempion bo'lgani o'z tasirini o'tkazdi.
- Jamoada sharoitlar qanday?
- Hozircha yaratilgan sharoitlarimiz yomon emas. Rahbariyat etibor qaratmoqda. Biroq sharoitlar sovrinli o'rinlar uchun kurashadigan jamoalardek bo'lishidan umidvormiz.
- Bu yilgi maqsadlar haqida nimalarni ayta olasiz?
- Birinchi ligadan ko'tarilganimiz tufayli elitada jon saqlab qolish vazifasi qo'yilgan. Natijalarimizda ijobiylik kuzatila boshlagani tufayli kuchli oltilikda kurashsak bo'ladi. Ishtaha ovqat paytida keladi deganidek, maqsadlarimiz ham natijalarga qarab o'zgarib boradi.
- Bugungi kunda jamoangiz safida qaysi yigitlarni tajribali deya olasiz?
- Elyor Domlaev va Rashidjon Jabbarov tajribali deya olaman.
- Oliy ligaga yo'llanma qo'lga kiritilganidan so'ng tarkibni kuchaytirish qiyin kechmadimi?
- Tarkibga jalb qilinganlarning barchasi o'zlarini ko'rsatish uchun imkoniyat paydo bo'ldi. Masalan Avazbek Abduvaliev ham havaskor sifatida jamoaga jalb qilindi. Endilikda u futzalchi sifatida o'zini ko'rsatmoqda.
- “Neftchi” 3-tur bahslaridagi raqiblari borasida nimalarni ayta olasiz?
- Oldindan biror nima deyish qiyin. Ammo, o'zimiz uchun kerakli miqdorda ochko ishlab olishimiz mumkin. Deyarli teng kuchga ega jamoalar bilan kurashamiz. Biz bu o'yinlarda ijobiy natijaga erishmoqchimiz.
Bosh sahifaga
80
