“Bunyodkor” safida to'p surayotgan legionerlar Davronjon Ergashev hamda Odiljon Abdurahmonov Tojikiston va Qirg'iziston milliy terma jamoasi tarkibida o'rtoqlik uchrashuvida maydonga tushdi. Tojikiston milliy terma jamoasi Nursultonda Qozog'iston mehmoni bo'lib, 1:0 hisobida mag'lubiyatga uchradi. Davronjon Ergashev bellashuvda 90 daqiqa to'p surdi va 75-daqiqada hakam tomonidan ogohlantirildi.
Qirg'iziston milliy terma jamoasi esa, FIFA kunlari doirasida ikkita o'yin o'tkazdi. 11 noyabr kuni BAAning SHarja shahrida Singapur 2:1 hisobida mag'lubiyatga uchratilgan bo'lsa, oradan besh kun o'tib Riffada Bahrayn qo'shnilarimizdan ustun keldi – 4:2. Ahamiyatlisi, mazkur bellashuvda jamoa yarim himoyachisi Odiljon Abdurahmonov hisob 1:1 ko'rinish olib turgan vaqtda qirg'izistonliklarning ikkinchi goliga mualliflik qildi. Abdurahmonov uzoq masofadan ajoyib zarba yo'llab, mezbonlarni maydon markaziga chorladi. Ammo bu gol Qirg'iziston milliy terma jamoasining g'alabasiga etarli bo'lmadi, yakunda mag'lubiyatga uchradi.
Bosh sahifaga
387
10 Avgust 2026, 15:42