Hayotda ancha muloyim yigit bo'lsa ham, koptokni ko'rishi bilan haqiqiy "gladiator"ga aylanadigan futbolchi bilan suhbat uyushtirdik.
1. Avvalo, tug'ilgan kun bilan tabriklayman. Bayramni qaerda nishonlayapsiz?
- Katta rahmat. Odatdagidek uyda, oila davrasida.
2. Davron Hoshimov futbol o'ynab keta olmasa, qaysi kasbni tanlar edi?
- Bu haqda hech o'ylab ko'rmagan ekanman. Qassob bo'lsa kearak (kuladi).
3. OCHLda debyut qilgan o'yiningizda "Paxtakor" qanday tarkib bilan maydonga tushganini eslay olasizmi?
- BAA jamoasi edi. Adashmasam, Timur Jo'raev, Egor Krimec, Kaxi Maxaradze, Adnan Oroxovac, Stanislav Andreev, Irakli va Farhod Tojievlar bor edi.
(To'g'ri, raqib Amirliklarning "Bani Yas" jamoasi edi. "SHerlar" ustozi Deyan Jurjevich o'sha kuni quyidagi futbolchilarni asosiy tarkibga kiritgan: Timur Jo'raev, Davron Hoshimov, Egor Krimec, Aleksey Nikolaev, Stanislav Andreev, Kaxi Maxaradze, Oybek Qilichev, Dilshod SHarofetdinov, Sanibal Oraxovac, Irakli Klimiashvili va Baxriddin Vahobov — tahr.)
4. Futbol muxlislari orasida laqabingiz "Maykon" ekanini bilamiz. Bolaligingizda qaysi futbolchiga havas qilar edingiz?
- Braziliyalik fulbeklar, xususan, Dani Alvesh va Kafuning o'yinlari yoqardi.
5. CHempionlar Ligasining 2016 yilgi mavsumida juda muhim golingiz bor. Qaysi jamoaga urganingiz yodingizdami?
- Albatta. O'sha yili bitta gol urganman. U ham bo'lsa, "Al Hilol" darvozasiga.
6. Davron Hoshimovning o'sishi uchun eng katta hissani qaysi murabbiy qo'shgan?
- Katta futbolga o'tayotgan mahalimda Samvel Babayan.
7. Birga o'ynagan eng kuchli jamoadoshlaringiz orasidan 5 nafarini ajratib bering.
- SHerzod Karimov, Jamshid Iskandarov, Jaloliddin Masharipov, Igor Sergeev va Egor Krimec.
8. Maydonga o'zgacha ruhiyat bilan tushib, haqiqiy jangchiga aylanasiz. Sizni bazan haddan ortiq qo'pol o'ynab yuboradi, deyishadi. Rostan ham shundaymi?
- Sababini aniq bilmayman. Lekin meni raqibga nisbatan atayin jarohat etkazadi, deb o'ylashadi. Yashil maydonga chiqishim bilan faqat g'alaba haqida o'ylayman. SHu bois xato qilgan epizodlarimda qoidani buzishim mumkin, biroq hech qachon birovni jarohatlash fikri bo'lmagan. Uning ham oilasi, bola-chaqasi bor axir. Istamagan holatimda kimgadir shikast etkazib qo'ysam, juda afsuslanaman va, albatta, uzr so'rayman.
Yana bir narsani unutmaslik kerak, futbol balet yoki shaxmat emas. Unda qo'polliklar bo'lib turishi tabiiy holat.
9. Futbol ichidagi eng yaqin do'stingiz kim?
- Jamshid Iskandarov.
10. Davron Hoshimovning futboldagi eng baxtli kuni qaysi edi?
- Terma jamoadan ilk bor chaqiruv olgan kunim. SHuningdek, "Paxtakor" safida birinchi chempionlik qo'lga kiritilgan lahzalarni ham unutib bo'lmaydi.
Bugun 29 yoshini qarshilayotgan himoyachiga saytimiz xodimlari va o'quvchilar nomidan uzoq umr, sihat-salomatlik tilaymiz.
Bosh sahifaga
330