Hamidjon Aktamov: "Navoyida futbol endi paydo bo'ladi"

"Mavsum tugadi, o'zimizga yarashmagan o'rinni egalladik. Yil boshida rejalarimiz boshqacha edi. Ikkinchi davra biz uchun qiyin o'tdi.

O'yin haqida gapirsak, birinchi taymda jamoam umuman o'ynay olmadi, ikkinchi taymda o'zimizga keldik, ammo vaqt etmadi. "Metallurg" jamoasi g'alabani ko'proq xohladi shekilli. To'g'ri, biz ham har bir bahsga g'alaba uchun tushamiz.

Yigitlar balki bugun oson yutamiz deb o'ylashdimi bilmadim. Barchadan uzr so'rayman, qo'limdan kelgan ishlarni qildim. Bu futbol, hayot davom etadi. Turtilib, surtilib o'rganaman. Ishlashda juda ham qo'pol xatolar qilmadik, ammo kamchiliklarimiz bo'lgan bo'lsa ularni to'g'rilashga harakat qilamiz", - dedi Aktamov.

- Keyingi mavsum gruziyalik futbolchilar jamoada qoladimi?
- Keyingi yil nima bo'lishini xudo biladi. Menimcha Navoiyda katta o'zgarishlar bo'ladi. Jamoada ham, infrastruktura ham yangilanadi. Quvondiq Sanoqulov boshchiligida futbol baza, akademiya, stadionlarimizni yangilab beraman dedilar. Ulardan juda ham minnatdormiz. Ravshan Ermatov va Quvondiq Sanoqulov hozir katta loyiha ustida ishlashmoqda. O'ylaymanki Navoyida endi futbol paydo bo'ladi. Hozirgacha biz oliy ligada qo'limizdan kelganicha qatnashib turdik. Ammo poydevor bo'lmasa natija ko'rsatish qiyin.