Baxtiyor Ashurmatov: "Birinchi davrada boy berilgan o'yin uchun revansh olishga intildik"

Baxtiyor Ashurmatov: “Navbahor” va uning muxlislari qalbimda chuqur iz qoldirgan”

- O'yin haqida

- O'yindan avval ham “Navbahor” bilan o'yin derbi maqomiga ega bo'lganligi sababli qaysi jamoa yutishidan qati nazar jangovar o'yin bo'lishi, futbolchilar oxirigacha kurashishini aytgandim. Gaplarim o'z isbotini topdi. Ikkala jamoa ham o'yin so'ngigacha chiroyli futbol namoyish etishdi. Yigitlar aytgan ko'rsatmalarimni to'g'ri bajarishdi va o'ylaymanki, bugun haqqoniy g'alabaga erishdik. “Navbahor” futbolchilariga ham minnatdorchilik bildirmoqchiman. CHunki ular 1:3 hisobida yutqazayotganda muxlislari uchun astoydil kurashishdi, ishqibozlar ham chiroyli futbol guvohiga aylanishdi va jamoalarini oxirigacha qo'llab-quvvatlashdi. Jamoamiz nomidan ularga minnatdorchilik bildiraman, doimo sog'-salomat bo'lishsin. Va albatta, Qo'qondan uzoq yo'l bosib kelib, bizga ishonishgani uchun katta rahmat. O'ylaymanki, keyingi mavsum “Navbahor” ham, “Qo'qon-1912” ham o'z oldiga yanada yuqoriroq vazifalarni qo'yadi, har ikki jamoa muxlislari jamoalari yuqori o'rinlarni egallashiga munosib.

- Jamoangiz birinchi davrada “Navbahor”ga yutqazib qo'ygandi, shu bois futbolchilaringiz o'zgacha ishtiyoq bilan to'p tepishdimi?

- Gapning ochig'i, bugungi o'yin shaxsan men uchun his-hayajonga boy o'yin edi. CHunki bundan avval “Navbahor”da ishlaganman, bu jamoa va uning muxlislari, o'sha ishlagan yillarim qalbimda chuqur iz qoldirgan. “Navbahor” muxlislariga nisbatan mehrim balandligini hech qachon yashirmaganman. SHu sababli bugungi uchrashuv men uchun principial ahamiyatga ega edi. Birinchi davrada boy berilgan o'yin uchun revansh olishga intildik, Xudoga shukrki, muxlislarimiz va rahbarlarimiz oldida yuzimiz yorug' bo'ldi. O'yin oxirida bo'lgan vaziyat uchun “Navbahor” muxlislaridan uzr so'rayman. Futbolchimizga ham tanbeh berdik, yoshlik qilib bir oz provokacion harakat qilib qo'yishdi. O'ylaymanki, keyingi o'yinlarda jamoamiz tomonidan bunday harakatlar qilinmaydi. Qo'qon va Namangan jamoalari, muxlislari hurmatga munosib, shu bois keyingi o'yinlar bundanda chiroyli o'tadi, deb o'ylayman.

- “Qo'qon-1912”ning joriy mavsumdagi natijasi bo'yicha fikringiz qanday?

- Natijadan qoniqmaganligimiz aniq, chunki bu mavsum vodiy futboli uchun muvaffaqiyatsiz bo'ldi. Biz ham, “Navbahor” ham katta niyatlar bilan mavsumni boshlagandik, lekin afsuski, o'z maydonimizda juda ko'p ochko yo'qotganimiz tufayli yuqori o'rinlarni egallay olmadik. Mavsumni biz uchun qoniqarsiz deb aytish mumkin. Afsuski, “Turon” va “Andijon” jamoalari Superligani tark etishdi. Menimcha, vodiy jamoalari ham yuqori o'rinlar uchun kurashadigan darajaga chiqsa, bundan chempionatimiz saviyasi yanada oshadi. Zero, vodiylik muxlislar futbolni juda yaxshi ko'rishadi.