Bunday uchrashuvlardan so'ng tabiiyki murabbiylarda ham qiziqarli fikr va mulohazalar yuzaga keldi. Tur iqtiboslari ruknida klublarning bosh murabbiylari tomonidan yangaragan fikrlarni yana bir yodga olamiz.
"Bunyodkor" bosh murabbiyi SHuhrat Maqsudov jamoasining tayyorgarligi va muxlislar haqida shunday dedi.
"Har bir o'yin oldidan raqiblarga qarshi tayyorlanamiz. Lekin ichki raqib vahimali bo'ladi. Bugun ham yutqazayogan paytimizda xursand bo'lib, bizga qarshi muxlislik qilganlar bo'ldi. Barchasini ayta olmayman, vafodor muxlislarimiz ham bor". (s) SHuhrat Maqsudov
Turli gap-so'zlarga qaraganda, keyingi yil "Paxtakor" byudjeti qisqarishi va tarkib yosharishi kutilayotgan ekan. Jamoa bosh murabbiyi Piter Xyuistra ushbu masalada shunday dedi. Uning fikricha, "Paxtakor" yoshlar bilan ham sifatli futbol ko'rsata oladi.
"Bu klub rahbariyatining qaroriga bog'liq. Agar yoshlar bilan o'ynaydigan bo'lsak, akademiyamizda iqtidorli yoshlar juda ham ko'p. Ular bilan o'ynasak ham, sifatli futbol ko'rsata olamiz". (s) Piter Xyuistra
"Qizilqum" klubi bosh murabbiyi Hamidjon Aktamovning matbuot anjumanlaridagi noodatiy va original fikrlariga odatlanganmiz. "Metallurg" bilan o'yindan so'ng mutaxassis keyingi yillarda katta o'zgarishlar bo'lishiga shama qildi.
"Menimcha, Navoiyda katta o'zgarishlar bo'ladi. Jamoada ham, infrastruktura ham yangilanadi. Quvondiq Sanoqulov boshchiligida futbol baza, akademiya, stadionlarimizni yangilab beraman, dedilar. Ulardan juda ham minnatdormiz. Ravshan Ermatov va Quvondiq Sanoqulov hozir katta loyiha ustida ishlashmoqda. O'ylaymanki, Navoiyda endi futbol paydo bo'ladi. Hozirgacha biz oliy ligada qo'limizdan kelganicha qatnashib turdik. Ammo poydevor bo'lmasa, natija ko'rsatish qiyin". (s) Hamidjon Aktamov
"Turon" bosh murabbiyi Bahrom Hakimov o'ziga nisbatan "qarib qolibsiz" degan mazmundagi tanqidlarga "Andijon" bilan bahsdan keyin matbuot anjumanida quyidagicha javob berdi:
"Metallurg" bilan o'yindan so'ng futbol "professorlari" men to'g'rimda yaxshi gaplarni yozishmadi. "Keksayib qolibsiz, ishni to'xtating" qabilidagi fikrlarni aytishdi. Kimdir men bilan 50-60 metr masofaga chopishmoqchi bo'lsa, marhamat. Yoki boshqacha usulda musobaqalashmoqchi bo'lsa ham tayyorman". (s) Bahrom Hakimov
AGMK jamoasida joriy mavsum ikkinchi o'rinni olish uchun juda yaxshi imkoniyat yuzaga kelgandi. Biroq so'nggi turda o'z maydonida "So'g'diyona"ga engildi. Qizig'i, dastlab kubok, keyin Superligada VAR tizimi raqiblar foydasiga qaror chiqardi. Hakamlik borasida Mirjalol Qosimov quyidagicha mulohazalari bilan o'rtoqlashdi:
"Bir narsa borda, biz ham osmondan tushib qolmaganmiz. Insof o'ziga bersin, menga ham, barchamizga insof bersin. Bunday muxlislar O'zbekistonda yo'q, muxlislarni aldab bo'lmaydi. Biz OKMK zavodida og'ir mehnat qiladigan insonlar ishdan keyin kelib, hordiq chiqarishlari uchun o'ynaymiz. Hakamlarga baho beradigan insonlar bor, men o'z ishim bilan shug'ullanishim kerak". (s) Mirjalol Qosimov
Tarixiy natija qayd etgan "So'g'diyona" chempionatda kumush medallariga ega chiqdi. Jamoa ko'rsatayotgan o'yin borasida saytimiz jurnalisti Faxriddin Ro'ziev statistikalar bilan tanqidiy maqola yozgan edi. Ikkinchi o'rinni qo'lga kiritgan Ulug'bek Baqoev AGMK bilan uchrashuvdan keyin bu borada o'z fikrini bildirdi:
"To'g'risini aytganda, bu jurnalist kim ekanligini bilmayman. U qaerdan bunday statistikani olganini bilmayman. Futbolda ko'plab natijalarni hisobga olish kerak, biroq u biz haqiqatdan ham eng yomon bo'lgan vaziyatlardagi statistikani olgandi. Jamoa uchun faqat natija kerak. Jamoa bu uchun qanday o'ynaydi. Istasa himoyadan o'yin olib boradi yokida hujum qilib". (s) Ulug'bek Baqoev
"Navbahor" bosh murabbiyi Viktor Jalilov jamoasining mavsumdagi ishtirokini kema misolida tushuntirdi:
"Birinchi davradan kelib chiqib fikr yuritsak, jamoamiz go'yo to'fonga tushib qolgan kemaga o'xshardi. Bir o'yinda g'alaba qozonsak, birida o'z maydonimizda ochko yo'qotdik, keyin esa mehmondagi uchrashuvlarda ochko oldik. Barqarorlik etishmadi. Ikkinchi davrada esa o'yinda muvozanatni tiklashga erishdik, “kema” ham to'g'ri yo'liga tushib, ravon “suzish”da davom etdi". (s) Viktor Jalilov
Mavsum so'ngida "Metallurg"ni Superligada olib qolgan Luisma Ernandes O'zbekiston kubogi finaliga taxmin bildirdi:
"Qiziq o'yin bo'ladi. Mavsumning yakuniy o'yini bo'lgani uchun ikki jamoa ham borini berib harakatlanadi. Qog'ozda "Paxtakor" – favorit, lekin "Nasaf" jang taklif qiladi". (s) Luisma Ernandes
Abdulaziz Iskandarov
Bosh sahifaga
183
