"Raxat Japarov bilan kelishamiz" - "Buxoro" rahbari

Biz u kishi bilan bog'lanib, jamoa haqida bazi savollarga javob oldik.

— "Buxoro" jamoasini qabul qilgunga qadar qaerda faoliyat yuritgan edingiz?

— Men bunga qadar Buxoro viloyati ichki ishlar boshqarmasida ishlaganman. Endi klub tizimida ishlash nasib qildi. O'zim futbolni juda ham yaxshi ko'raman, yangiliklardan har doim boxabarman.

— Nima uchun jamoaning nomi "Nurafshon"ga o'zgartirilmadi?

— Klubga kelishimiz bilan muxlislarning bu boradagi fikrlariga qiziqdik. Maxsus so'rovnama tashkil qildik. Unda jamoa ishqibozlarining ko'pchilik qismi "Buxoro" nomi saqlanib qolishini yoqladi. SHundan keyin faxriylar va jamoa rahbariyati bilan muhokama qilgan holda "Buxoro" nomini hozircha saqlab turish fikrida to'xtaldik.

— Jamoaning ayni paytdagi holati va kelasi mavsumga qo'yiladigan maqsad haqida...

— Bugungi "Buxoro"ning anchagina qarzi bor. Bu borada amaliy ishlar olib borilyapti. Kelasi yilga asosiy rejamiz Superligaga qaytish bo'ladi. SHu tufayli jamoa rahbariyati va tasischilari bilan kelishgan holda Hakim Fuzaylovni taklif qildik. Biz mazku mutaxassisga ishonamiz.

— 2021 yilgi tarkib saqlanib qoladimi? SHavkat Salomov, Sanat SHixov singari tajribali futbolchilar bilan bu borada gaplashildimi?

— Tarkib masalasi ko'proq murabbiyning xohishiga bog'liq. Lekin, bir qator o'yinchilar bilan uzoq muddatli shartnomamiz bor. SHavkat va Sanat bilan aloqalaramiz yaxshi. Bilasiz, Salomov Buxoro xalqining eng sevimli o'yinchilaridan hisoblanadi. O'ylashimcha, ular ham biz bilan ishlashga qarshi bo'lmasa kerak.

— Nihoyat, stadion masalasini tartibga soladigan payt keldimi? "Buxoro" 2 yildan beri o'z uyida o'ynay olmayapti.

— Albatta, klubga kelganimizda bizni 2 masala tashvishga solayotgan edi: murabbiy va stadion. Ulardan birini hal qildik. O'yingoh masalasi ayni paytda faqat bizni emas, viloyat rahbarlarini ham o'ylantirmoqda. Nasib bo'lsa, 2022 yilgi mavsumni G'ijduvonda emas, Buxoro shahrida boshlaymiz.

— FIFA Raxat Japarov masalasida "Buxoro"ga xat yuborgan edi. Bu ish ayni paytda qaysi bosqichda?

— Ha, bu borada xat oldik. Turkmanistonlik legioner bilan shartnomani Usmon Toshev bekor qilgan ekan. Faqat klub uning 2 oylik maoshini ko'rsatilgan muddatdan 4 keyin to'lab bergan. Bilasiz, biz shaxsiy jamoa emasmiz. Homiy mablag'ni o'tkazishda biroz kechikkan. Japarov esa shartnomadagi banddan foydalanib, yil oxirigacha bo'lgan oyligini undirib olmoqchi. Biz bu masalani O'zPFL bilan maslahatlyapmiz, tez orada Raxat bilan bog'lanib, kelishishga urinib ko'ramiz.