Bizga etib kelgan malumotlarga ko'ra ertaga g'olib va sovrindorlar taqdirlanadi. Medallar uchun kurash olib borayotgan jamoalarning o'yinlari bir vaqtda boshlanadi.
Biz boshqa masala bo'yicha so'z yuritmoqchimiz. Mavsum avvalidagi taqvimga ko'ra jamoalar ikki davrada 13tadan 26ta o'yin o'tkazishi kerak edi. Biroq pandemiya sababli PFL formatni o'zgartirdi va U-18 birinchiligi bir davrali formatda yakuniga etadigan bo'ldi. Reglamentga ko'ra 50 foiz va undan ko'p o'yinlarda ishtirok etgan jamoa musobaqani o'z ixtiyori bilan tark etsa yoki PFL tomonidan chetlashtirilsa o'sha jamoa qolgan o'yinlariga texnik mag'lubiyat, raqiblariga esa texnik g'alaba yoziladi. Aksincha jamoa 50 foizdan kam uchrashuvlarda maydonga tushgan bo'lsa jamoaning barcha o'yinlarining natijasi bekor qilinadi. Xabaringiz bor Muborakning "Mashal" jamoasi moliyaviy qiyinchiliklar sabab Farg'onada markazlashgan holatda o'tgan chempionatga bormadi. Farg'onada 8-10 - turlar o'tkazildi. Reglamentga ko'ra ikkita o'yinga sababsiz kelmagan jamoa musobaqadan chetlashtiriladi. O'z-o'zidan "Mashal" chetlashtirildi va bu to'g'ri. PFL esa jamoaning qolgan o'yinlariga texnik mag'lubiyat yozdi.
Malum bo'lishicha PFL reglamentdagi ikki davrali musobaqa uchun qo'llaniladigan 50 foizlik qoidani bir davralik formatda o'tayotgan U18 birinchiligi uchun qo'llayotgan ekan. Yani "Mashal"ning 8-turdan keyingi o'yinlariga texnik mag'lubiyat yoziladi, raqiblariga esa texnik g'alaba. Lekin birinchi turdan ettinchi turgacha bo'lgan oraliqda qo'lga kiritgan natijalari saqlanib qolinadi. Bizning etiborimizni tortgan jihati bu erda sport principlari buzilmayaptimi? 50 foiz deganda bir jamoa o'sha musobaqaning barcha ishtirokchisi bilan kamida bir martadan o'ynab chiqishi kerak. SHuning uchun ham ikki davrali musobaqaga ushbu qoida qo'llaniladi. Bir davralik tizimda 50 foizlik qoidani qo'llash mehnat qilib ochko qo'lga kiritgan yoki durang o'ynagan jamoalarga hurmatsizlik emasmi? "Mashal" U-18 jamoasi bir davralik formatda har bir jamoa bilan bir marotaba o'ynagani yo'q, 7-turdan so'ng chempionatda ishtirok etmadi. PFL esa ikki davraga o'tadigan 50 foiz degan qoidani bir davrali formatga ham qo'llamoqda. PFLdan bu borada izoh kutib qolamiz.
Abdulaziz Iskandarov
Bosh sahifaga
248