Yangi yilning ilk kunlaridan boshlab klub matbuot xizmati ketma-ket transferlarni elon qilishni boshladi. Deyarli barcha chiziqlarda raqobat yuzaga kelmoqda. Ayniqsa bu yil "Navbahor"ning markaziy yarim himoyasida to'p tepish uchun futbolchilar tanlovi keng. Etibor beradigan bo'lsak, Azim Ahmedov, Nurillo To'xtasinov, Yovan Jokich, Jamshid Boltaboev singari ijrochilar yig'ilgan. SHuningdek Ehsoni Panshanbe ham bor. Yangi kelib qo'shilgan futbolchilar bunday raqobatga tayyormi? Bu borada Jamshid Boltaboevning fikrlari bilan qiziqdik.
- Og'ir jarohatdan so'ng "So'g'diyona"ga o'tib yaxshi sport formangizga kirib oldingiz. Qaysidir manoda katta futbolga qaytishingizga bu jamoa yaxshigina turtki bo'ldi, deya olamiz. O'tgan mavsum esa bularning barchasiga chiroyli yakun yasab berdi deyishimiz mumkinmi?
- Avvalambor assalomu aleykum. Barchani kirib kelgan yangi yil bilan tabriklayman. Savolingizga kelsak, "Paxtakor"da to'p tepib yurgan kezlarimda juda jiddiy jarohat olgan edim. Buni faqat o'zim va yaqinlarim bilishadi. O'shanda yordam bergan Jafar Irismetov va SHota Arveladzega rahmat aytmoqchiman. Klub bilan shartnomam tugagan bo'lsada, davolanish uchun Turkiyaga yuborishdi. Davolanib kelganimdan keyin ham tashlab qo'yishgani yo'q. Yangi shartnoma ham taklif qilishdi. O'shanda jamoa o'z oldiga katta maqsadlarni qo'ygandi. Jamoadan ketish haqida esa o'zim o'yladim. Ikki yil futbol o'ynamaganim uchun asosiy tarkibga kurashishga ko'zim etmadi. Natijada "So'g'diyona" bosh murabbiyi Sergey Ivanovich Lushchandan taklif oldim. Jamoaga men bilan bir hil jarohat olgan Javohir Sohibov ham keldi. Ushbu mutaxassisga ishonch uchun rahmat aytaman.
- "So'g'diyona"dagi faoliyatingizdan qoniqdingizmi?
- Umuman olganda qoniqdim, deya olaman. Jamoa bilan yaxshi o'rinlarni egalladik. Eng yaxshi mavsum sifatida baribir o'tgan yilni ko'rsataman. Ikkinchi o'ringa osonlikcha erishilmadi. Barcha bir maqsad yo'lida harakat qildi.
- Jamoani o'zgartirish qaroriga qachon keldingiz yoki bu avvaldan o'ylanganmidi?
- Yo'q. Bunday desam noto'g'ri bo'ladi. Mavsum yakunlangach bitta "Navbahor"dan emas, boshqa jamoalardan ham takliflar bo'ldi. "So'g'diyona"dagilar ham ketmasligimni so'rashdi. Lekin ichimda nimadir ketishim kerakligini aytdi. Yakunda "Navbahor" taklifini qabul qildim. O'z navbatida "So'g'diyona" klubi rahbarlari va muxlislariga rahmat aytaman.
- "Navbahor"ga o'tishingizda bosh murabbiy Samvel Babayan muhim rol o'ynadimi?
- Mazkur jamoaga o'tishimda klub rahbari Otabek aka va Samvel Vyacheslavovich bilan gaplashdim. Klub o'z oldiga qo'ygan maqsadlarini inobatga olib shartnoma imzoladim.
- Ushbu savolni odatda "Navbahor"ga yangi kelib qo'shilgan futbolchilarga beramiz. Namangandagi bosim va tanqidlarga ruhan tayyormisiz?
- Qanday jamoaga kelganimni bilaman. Menimcha o'z oldiga yuqori maqsadlarni qo'ygan har bir jamoada bosim bo'ladi. Umuman olganda tayyorman. Jamoaning ishqibozlari juda talabchan. Bundan xabarim bor. Xudo xohlasa bu yil muxlislarni xursand qilamiz. Etirozlar bo'lmaydi, deb umid qilaman. Agarda tanqidlarni eshitgan taqdirimizda ham to'g'ri tushunib yuqori o'rinlarni egallash uchun harakat qilamiz.
- Yuqorida aytganimizdek siz to'p tepadigan nuqtada bir qancha ijrochilar yig'ilgan. Ular bilan raqobatlashish yaxshigina mehnatni talab qiladi...
- Raqobat bor joyda o'sish bo'ladi. Bundan aslo qo'rqmayman. Kim kuchli bo'lsa, o'sha futbolchi to'p tepishi tarafdoriman.
Bosh sahifaga
406