O'tgan mavsumni AGMKda o'tkazgan yarim himoyachi Sanjar SHoahmedov ham shu kunlarda faoliyatiga aniqlik kiritib olishi kutilmoqda. Futbolchi saytimizga bergan intervyusida Malayziyadan takliflar borligini, hozirda tanlov jarayoni ketayotganini malum qildi. Malumki, Sanjar SHoahmedov ikki mavsum mazkur mamlakat vakili "Terrenganu" jamoasidagi harakatlari orqali mahalliy murabbiy va muxlislarda iliq taassurot qoldirgandi.
- O'tgan mavsumni AGMK safida o'tkazdingiz. Bu jamoa siz uchun qadrdon hisoblanadi. Xo'sh, sizni qoniqtirgan yoki qoniqtirmagan jihatlar haqida aytib bersangiz...
- To'g'ri aytdingiz. AGMK men uchun begona emas. Superligadagi faoliyatim shu jamoa orqali boshlangan. Klubda barcha narsa qoniqtirdi. Jamoada hamma ahil-inoq.
- Mavsumning so'nggi pallasiga kelib jamoada kubok finaliga yo'llanma olish va ikkinchi o'rinni qo'lga kiritish uchun juda qulay imkoniyat yuzaga kelgandi...
- Hammasi o'z qo'limizda edi. Ko'rdingiz. Yarim finalda g'olib nomi 110 daqiqagacha ham aniq emasdi. Ikkita gol ham urishga erishdik. Gollarimiz hisoblanmadi. Ikkinchi o'rin uchun "So'g'diyona" bilan oxirigacha kurash kechdi. Omad kelmasa qiyin ekan.
- Avvalgi yillarda Malayziyada to'p tepdingiz. AGMK siz uchun vaqtinchalik "qo'nish" maydonchasi, o'zingizni ko'rsatib olish vazifasini bajarib berdimi?
- Ikki yil Malayziyada to'p tepib Olmaliqqa qaytdim. Buning sababi jamoa oldiga yuqori maqsadlar qo'yilgandi. Maqsadim jamoa bilan OCHLga yo'llanma olish edi, desam mubolag'a qilmagan bo'laman. Oldimda boshqa variantlar ham boridi. Xudoga shukur pley-offda Qatarda "Al G'arafa"dan ustun kelib guruhga chiqdik. Bu ham katta natija.
- Agarda AGMK OCHLga yo'llanma yoki mavsumni sovrin bilan yakunlaganida sizning ham jamoada qolishingiz ehtimoli bormidi?
- Mavsum tugamasidan oldinoq o'zimizdan 2-3ta jamoalar qiziqish bildirayotgandi. Keyin esa o'zimni xorijda sinab ko'rish fikri tug'ildi. Bu yil yoki xorijda, yoki o'zimizda to'p tepaman. Katta ehtimol bilan jamoamni o'zgartiraman.
- Bugungi kunda Superligamizdagi legionerlar saviyasini 5 ballik tizimda qanday baholagan bo'lardingiz?
- O'zim ham legioner sifatida o'ynaganman. Buni qiyinchligini bilaman. To'g'risini aytganda 5 ballga loyiq legionerlar yo'q. Agar baholaydigan bo'lsak, 4 ball.
- Bilishimizga qaraganda sizni yana Malayziya klublari o'z safida ko'rishni istayotgan ekan. U erda muxlislar sizni yaxshi bilishadi. Ayniqsa "Terrenganu" jamoasidagilar ijtimoiy tarmoqlarda ham eslab turishadi..
- Xudoga shukur Malayziyada o'zimga yarasha hurmatim bor. Murabbiylar yaxshi tanishadi. "Kedax" va boshqa jamoalardan jiddiy takliflar bor.
- Pandemiya sabab Tailand va boshqa SHarqiy Osiyo klublarida oyliklar qisqarishi, maoshlarda muammolar paydo bo'lmoqda. SHuningdek kutilmaganda chempionat ham to'xtab qolishi hech gap emas...
- SHu tomonlarini ham o'ylayapman. Aytganingizdek u erda pandemiya sabab chempionatni to'xtatib qo'yishadi. Tailand, Malayziyada vaziyat jiddiylashsa mashg'ulotlarni ham bekor qilinadi.
- Tashqaridan olib qaralganda Malayziya chempionati, futboli kuchsiz ko'rinadi. Qaysidir manoda to'g'ri daraja jihatdan ortda. Klublardagi sharoitlar, yo'lga qo'yilgan ish borasida bizdan ustun tomonlari ham bor...
- To'g'ri. Media, marketing, vitaminlash, maydonlar borasida juda oldinga siljishgan. Futbolchilarni tanishtirish tadbirlari ham boshqacha. SHuningdek Ispaniya, Braziliyadan kuchli legionerlar taklif qilinmoqda. Oldin hech kim mensimas edi.
Bosh sahifaga
202