Ulug'bek Baqoev boshchiligidagi jizzaxliklar bugun asosan tiklanish mashqlarini olib borishdi. Jamoaning poytaxtda o'tayotgan yig'iniga kecha xabar berganimizdek Doniyor Abdumannopov kelib qo'shildi. 2021 yilning "Andijon" va Belarus chempionati vakili "Energetik-BGU"da o'tkazgan hujumkor yarim himoyachi jamoa bilan birga mashg'ulot o'tkazdi. Engil tarzda o'tgan bugungi mashqlardan so'ng Abdumannopovni suhbatga chorladik.
- Faoliyatingizda yangi sahifa ochilishi kutilgan "Enegetik-BGU"dagi faoliyatingiz haqida gapirib bersangiz. Aftidan legioner sifatidagi ilk urinish har holda omadsiz chiqqan ko'rinadi...
- Omadsiz deyish biroz noto'g'ri. Sportda jarohat doim yonma-yon yuradi. O'zimni to'liq ko'rsatishim uchun jarohatim pand berdi. Belarus chempionatida jismoniy tayyorgarlikka professional yondoshilar ekan. Boshqa muhitda to'p tepib kerakli xulosalarni oldim. Ayniqsa muxlislar qadri juda ham bilindi. Umumiy qilib aytganda o'rganishim kerak bo'lgan narsalar ko'pligini bildim.
- Balki jismoniy taraflama to'liq tayyor emasligingiz ham katta rol o'ynagandir. Boisi mazkur chempionatda o'ynab qaytgan futbolchilar biz aytayotgan jihat qattiq nazoratga olinishi haqida ko'p takidlashgandi...
- Xa to'g'ri aytmoqdasiz. Bu erda yuqori kuch va pressing birinchi o'rinda turar ekan. Men bunga tayyor edim. Ammo futbolchiga bog'liq bo'lmagan sabablar ham mavjud. Ob-havo, mahalliy sharoitga moslashish sabablari pand berdi.
- Jarohatingiz borligini bilar edik. Odatda O'zbekiston chempionatida futbolchilar ukol bilan bo'lsa ham maydonga chiqib jamoaga yordam berishadi. Keyin esa jarohatlarni o'rni chiqib kelaveradi. Mana shu omil legionerga aylangan futbolchilarimizga tasir qilmayaptimikin?
- Menimcha tasir qiladi. Baribir tabiiylikka hech narsa etmaydi. Bu shaxsiy fikrim. Albatta men mutaxassis emasman. SHuni angladimki, futbolchi iqlim, taom va boshqa narsalarga moslashuvchan bo'lishi lozim.
- "So'g'diyona"ga qo'shilishingiz jarayonlari va tafsilotlari bilan o'rtoqlashsangiz...
- Bosh murabbiy Ulug'bek aka o'zlari taklif bilan chiqdilar. Ampulam yaqqol hujumchi bo'lmasada, hujumkor yarim himoyachiman. Ulug'bek Baqoev tarixda kuchli hujumchilardan biri bo'lganlar. Ulardan ko'p narsa o'rganib jamoaga foyda keltiraman, deb umid qilaman. Maqsadim yanada o'sishga erishish.
- "Andijon"ning muvaffaqiyatsizligi va Pro ligaga tushib ketgani sizni ham befarq qoldirmagan bo'lsa kerak...
- Jamoa yanada kuchli bo'lib Superligaga qaytishiga ishonaman. Yuqori o'rinlar uchun harakat qiladigan jamoaga aylanishini tilayman.
Abdulaziz Iskandarov suhbatlashdi
Bosh sahifaga
199