Unga bir nechta jamoalardan taklif kelib tushgandi. Yakunda markaziy himoyachi “Qizilqum”ga o'tishga qaror qildi. SHu munosabat bilan Boburni qisqacha suhbatga chorladik.
- Bobur, AGMK jamoasining etakchi o'yinchilaridan biri edingiz. Ammo yaqinda “konchilar” jamoasidan ketishga qaror qildingiz. Bu jarayon o'zingizning istagingiz bilan amalga oshdimi yoki sizga klub tomonidan yangi shartnoma taklif etilmadimi?
-O'zimning xohishim bilan AGMK dan ketdim. Klubda qolib yana faoliyatimni davom ettirish bo'yicha taklif bo'lgandi. Ammo men muhitni o'zgartirishga qaror qildim. Fursatdan foydalanib, AGMK jamoasi rahbariyati, bosh murabbiy Mirjalol aka Qosimov, qolaversa jamoaning barcha ishchi xodimlaridan minnatdorman va ularga kelgusida omad tilayman.
- “Qizilqum” variantini tanlashingizga ko'proq nima sabab bo'ldi?
- Jamoada katta o'zgarishlar yuz berish arafasida. “Qizilqum” bu yil o'z oldiga yuqori maqsadlarni qo'ymoqda. Aynan shu omillar meni Navoiy jamoasiga o'tishimga turtki berdi.
-AGMKda har yili medallarga ega bo'ldingiz. “Qizilqum” esa Superliganing o'rtamiyona jamoasi hisoblanadi. SHunday ekan, bu jamoaga o'tishingiz ortga tashlangan qadam bo'lmaydimi?
- Buni albatta vaqt ko'rsatadi. Qaerda bo'lsam ham o'z ustimda ishlashdan to'xtamayman. Faqat oldinga intilaman.
- “Qizilqum”da yangi bosh murabbiy ish boshlash arafasida degan xabarlar quloqqa chalinmoqda. Bu klubga sizni kim taklif qildi?
- Hamidjon Aktamovning taklifiga binoan “Qizilqum”ga o'tdim. Ochig'i, men uchun kimning bosh murabbiy bo'lib ishlashi muhim emas. Asosiysi maydonga chiqib, o'z vazifamni bekamu-ko'st bajarib, klub ravnaqiga o'z hissamni qo'shishdir.
- SHartnoma muddati nechchi yilga mo'ljallandi?
- Hozircha shartnoma shartlarini og'zaki kelishib qo'yganmiz. Tez kunlarda rahbariyat bilan uchrashib, amalda rasman bir yillik shartnoma tuziladi.
- Ilgari “Lokomotiv”da tarjribali Islom To'xtaxo'jaev bilan tandem bo'lib o'ynagansiz. “Qizilqum”ga o'tish oldidan u kishining ham maslahatiga quloq tutgan bo'lsangiz kerak?
- Albatta, Islom aka “Qizilqum”da o'ynab kelmoqda. Jamoani ichidan juda yaxshi biladi. SHu sababli u kishining ham maslahatlarini olib, yakunda ushbu jamoaga o'tishga rozilik berdim.
- “Qizilqum” yangi mavsumga tayyorgarlik bosqichining birinchi qismini qachonday boshlaydi? Umuman olganda, jamoaning rejalaridan xabaringiz bormi?
- Yo'q, hozircha bu bo'yicha batafsil malumotga ega emasman.
- U xolda yangi jamoangiz ixtiyoriga qachon borib qo'shilasiz?
- Yaqin 3-4 kun ichida “Qizilqum” lageriga etib boraman.
Bosh sahifaga
187
