Kecha turning markaziy uchrashuvida AGMK hamda "Lokomotiv" jamoalari o'zaro bahs olib borishdi. Juda ham qiziqarli kechgan o'yin futzalda juda kam kuzatiladigan 0:0 hisobi bilan yakunlandi.
Futzal. AGMK - "Lokomotiv". Markaziy bahsdan FOTOGALEREYA
Uchrashuv yakunlangach, olmaliqliklarning tajribali o'yinchisi Artur Yunusovning fikrlari bilan qiziqdik.
"Qarama-qarshiliklarga boy o'yin bo'ldi. AGMKga ham, "Lokomotiv"ga ham ochko zarur edi. "Loko" o'tgan gal bizga yutqazgandi, shu bois bugun yutish uchun jon-jahdi bilan harakat qildi. Jarohatdagilar va safda bo'lmaganlarning o'rni bilindi.
Tarkibimizda asosiy to'rtlik shakllanmay qoldi. Muzaffar Ahadjonov va Avaz Abduvaliev kasal bo'lib qolishgandi. Aksiga olib, 1-bo'limda asosiy o'yinchimiz Davron Valijonov ham jarohatlandi.
Yangi yildan keyin jamoamiz azolari hali tiklanib ulgurishmagani sezilmoqda. Tayyorgarlikka ham qisqa vaqt bo'ldi, uzoq hordiq chiqardik. Bugun jismonan qiyinchilikka uchradik.
Birinchi taymda raqib ustunlik qildi. Ikkinchi bo'limda esa ular charchab qolishdi va biz bosim qildik.
Umuman olganda, do'stlik g'alaba qozondi. Qaysidir manoda bundan "Huaxin-Jizzax" yutgan bo'lishi mumkin.
Hechqisi yo'q, hali hammasi oldinda. Bizni "Huaxin-Jizzax" va boshqa raqiblarga qarshi o'yinlar kutib turibdi. O'ylashimcha, "Dinamo" va "Neftchi" jamoalari ham chakki emas. "Neftchi" tarkibida terma jamoada o'ynab keta olishi mumkin bo'lgan futzalchilar bor. Faqat ularga to'g'ri yo'lni ko'rsatish kerak. O'ylaymanki, ularga imkoniyat berilsa, o'yinlari o'z-o'zidan ochilib ketgan bo'lardi.
Bu yilgi chempionat qizg'in davom etmoqda. Oldingi yillarda sovrinli o'rinlarni band etadigan jamoalar oldindan malum bo'lib ulgurardi.
Kuzatilayotgan yo'qotishlar bizga qimmatga tushyapti deb o'ylayman. Keyingi turlarda ham jismoniy taraflama qiynalsak kerak. SHaxsan o'zimni 60% ga tayyor his qilyapman, xolos. CHempionat oldidan biroz betob bo'lib qolganim ham o'z tasirini ko'rsatyapti", - dedi Yunusov.
Eslatib o'tamiz, ayni paytda "Lokomotiv" 13 o'yindan keyin 34 ochko bilan peshqadamlik qilmoqda. AGMKda 31 va "Huaxin-Jizzax"da 30 ochko mavjud. Lekin, ular peshqadamdan bitta kam o'yin o'tkazishgan.
Bosh sahifaga
807