Tajribali himoyachi bir necha yillik tanaffusdan so'ng yana O'zbekiston Superligasida faoliyatini davom ettirishga qaror qildi. Yaqinda “Bunyodkor” o'quv-yig'in mashg'ulotlariga borib qo'shilgan 34 yoshli futbolchi yaqinda yangi jamoasi bilan shartnoma imzoladi.
- Artyom, Sizni “Bunyodkor” mashg'ulotlarida ko'rgandik. Keyingi taqdiringizga oydinlik kiritib oldingizmi?
- Avvalambor, assalomu alaykum! Barcha yurtdoshlarimizni kirib kelgan yangi 2022 yil bilan chin dildan muborakbod etaman. Bilasiz, “Bunyodkor” jamoasida ilgari o'ynaganman. Jamoa bosh murabbiyi SHuhrat Maqsaudov bilan munosabatimiz yaxshi. Bu jamoada sport formamni ushlab turish maqsadida shug'ullanib kelayotgandim. Jamoa rahbariyati meni qolishimni taklif qildi. SHuningdek oldimda bir nechta takliflar turgandi. Yakunda Jizzaxning “So'g'diyona” jamoasiga o'tishga qaror qildim.
- “So'g'diyona”ning taklifi sizni ko'proq nimasi bilan o'ziga qiziqtirdi?
- Ularning taklifi men uchun har tomonlama ayni muddao bo'ldi. Eng avvalo bosh murabbiy Ulug'bek Baqoev bilan ilgari “Buxoro”da birga ishlaganmiz. Munosabatlarimiz juda yaxshi. Qolaversa “So'g'diyona” joriy mavsum ham o'z oldiga yuqori maqsadlarni qo'ymoqda. Jamoa Kubok va medallar uchun kurashishni maqsad qilgan. Nasib qilsa bu yo'lda jizzaxliklarga qo'limdan kelganicha yordam bermoqchiman.
- Yangi jamoangizdagi taassurotlaringiz qanday?
- Dastlabki taassurotlari yaxshi, albatta. Jamoa meni yaxshi qabul qildi. Tarkibdagi ko'plab futbolchilar bilan yaxshi tanishman. SHuning uchun ham hech qanday muammoni ko'rmayapman.
- Kelgusida sizni yana legioner sifatida ko'rishimiz mumkinmi?
- Hozircha asosiy etiborimni “So'g'diyona”da o'ynab, jamoa yutuqlariga o'z hissamni qo'shishga qaratganman. Qolganini vaqt ko'rsatadi.
- Bugungi kundagi Superliga haqida qanday tasavvurdasiz?
- Oxirgi uch yilni xorij chempionatida o'tkazdim. O'ylaymanki bu vaqt oralig'ida O'zbekiston Superligasida saviya ortgan. Qiziqarli o'yinlar soni ko'paygan. Agarda shu yo'nalishda ketsa, nasib qilsa ichki chempionatimiz yanada o'sishga erishadi.
- Asli samarqandlik hisoblanasiz. “Dinamo” jamoasida Superligaga chiqqach, tarkibda etiborga molik o'zgarishlarga qo'l urmoqda. Bu jamoa vakillari siz bilan aloqaga chiqishmadimi?
- To'g'risini aytsam, “Dinamo”dan menga hech qanday chorlov bo'lgani yo'q.
- Sizningcha transfer oynasida etibor molik o'zgarishlarni qaysi jamoa amalga oshirmoqda?
- Menimcha transfer bo'yicha “Navbahor”da yaxshi ishlar amalga oshirilmoqda.
Bosh sahifaga
156
