Bir guruh "temiryo'lchilar"ning navbatdagi manzili "Qizilqum". Bunga nima sabab bo'ldi?

Joriy mavsum qishki transferlar oynasida "Navbahor", AGMK, "Neftchi" jamoalari muhokama markazida bo'lyapti. Ular orasiga bemalol "Qizilqum"ni ham kirita olamiz. O'tgan mavsum "Lokomotiv"da to'p tepgan bir guruh ijrochilar endilikda navoiyliklar safida javlon uradi. Keling ayni paytga kelib jamoada nechi nafar sobiq "temiryo'lchilar" yig'ilganiga qarasak: Javohir Ilyosov, Temurxo'ja Abduholiqov, SHuhrat Muhammadiev, Bobur Yo'ldoshev, Ignatiy Nesterov, Sanjar SHoahmedov, Islom To'xtaxo'jaev. Bu holat ajablanarlimi? Yo'q. CHunki bunday holat futbolimizda ilk bor yuz bermayapti. O'z vaqtida "Paxtakor"ning bir nechta futbolchilari "Bunyodkor"ga, so'nggi yillarda "Nasaf" jamoasidagi ko'pgina ijrochilar "sherlar" safiga kelib qo'shilishgan. SHu bois "Lokomotiv" azolarining "Qizilqum"ga o'tishlarini oddiy qabul qildim. 

1. Hamidjon Aktamov 

Hamidjon Aktamov garchi shu kunga qadar murabbiy sifatida qirralarini to'liq ko'rsata olmagan bo'lsada, menejerlik bobida ko'pchilikka o'rnak bo'la oladi. Undagi kuchli tashkilotchilik, futbolchilar bilan har qanday vaziyatda til topishib keta olish xislati yuqoridagi nomlarni Navoiyga kelishiga sabab bo'lishi mumkin. Futbolchilarni jamoaga olib kelish, ularni ko'ndirish ham bir mahorat aslida. 

2. Mablag' tomonlama 

"Lokomotiv" klubi o'z siyosatini o'zgartirgan holda nomdor futbolchilardan voz kechib yoshlarga etibor qaratmoqda. Tajribali ijrochilar esa qaysidir manoda yaxshigina mablag' ishlab olish maqsadida ham "Qizilqum"ga o'tishmoqda. Mazkur holatga oddiy qaraymiz va to'g'ri tushunamiz. Futbolchining umri qisqa, u iloji boricha keyingi faoliyati uchun daromad qilib olishi kerak. "Qizilqum"ni tanlashlari uchun ikkinchi omil sifatida mana shuni keltiramiz. 

3. O'yinlarning Toshkentdagi "Lokomotiv" stadionida o'tishi 

Navoiydagi stadion maysasi almashtirilishi sababli "Qizilqum" uy uchrashuvlarini Toshkentda o'tkazadi. Bu esa sobiq "Loko"chilar uchun ayni muddao. To'g'ri poytaxtda raqiblarni qabul qilish vaqtinchalik. Lekin mana shu jarayonda jamoa yanada o'zaro jipslashib oladi. Ular chetga chiqishmaydi, "Lokomotiv" stadionida o'ynashda davom etishadi, faqat "Qizilqum" libosida.

Nima bo'lganda ham ularga yangi jamoada omad tilab qolaman. Yuqoridagilar esa faqat shaxsiy fikrim hisoblanadi.