Xususan, navbatdagi muloqot ishtirokchisi jamoaning taniqli sobiq futbolchisi Masud Toirov bo'ldi. Muxlislar bilan tashkil etilgan suhbat jarayoni savol-javob ko'rinishida etiboringizga havola etilmoqda.
- Assalomu alaykum, Masud. Onlayn muloqotimizga xush kelibsiz! Aytingchi, hozirgi kunda nimalar bilan bandsiz?
- Assalomu alaykum. Taklif uchun barchangizga rahmat. Men hozirgi kunda "Surxon" futbol klubida yoshlar jamoasi murabbiylar shtabida ishlab kelyapman.
- "Neftchi" safida o'ynab yurgan kezlaringizda jamoadagi asosiy raqobatdoshlaringiz kim bo'lgan deb hisoblaysiz?
- "Neftchi"da o'ynab yurgan vaqtlarimda raqobatdoshlarim Muhsin Nizomiddinov va Timur Xamidov bo'lgan.
- Jamoaning o'sha vaqtdagi bosh murabbiyi Yuriy Sarkisyandan boshqalardan ko'ra ham ko'proq dakki eshitganingiz rostmi? Uning o'zidan bu haqda so'raganimizda, ko'p harakat qilgan futbolchi vaziyatlarda ko'zga tashlanishi ko'proq bo'ladi deb aytgandi...
- Men o'zimni tezkor himoyachi bo'lganman deb ayta olmayman. Futbolchi maydonda harakat qilishi, kurashishi lozim. Xato qilgan bo'lsak, shunda murabbiy tanbeh bergan bo'lsa, buning yomon joyi yo'q.
- Havodagi kurashlarda qaysi hujumchi sizga qiyinchilik tug'dirgan?
- O'yin vaqtida raqib hujumchilariga gol urishga imkon qoldirmaslik uchun borimizni berib harakat qilardik. Havodagi kurashlarda menga "Nasaf"da o'ynagan hujumchi Zafar Xolmurodov qiyinchilik tug'dirardi. U havodagi kurashlarda boshi bilan juda yaxshi o'ynar edi.
- "Neftchi" jamoasiga sizni akangiz taklif qilganmi?
- Yo'q, jamoaga akam taklif qilmagan. Yuriy Sarkisyanga Xabaev degan murabbiy meni tavsiya qilgan va taklif etgan. U meni avvaldan yaxshi bilardi.
- Siz futbol o'ynagan vaqtlaringizda o'zbek futbolidagi eng kuchli hujumchilar kim edi?
- Men o'ynagan davrda kuchli hujumchilar ko'p edi. Masalan, Igor SHkvriringa qarshi ham o'ynaganman. SHuhrat Mirxoldirshaev, Zafar Xolmurodov, Jafar Irismetov, Aleksandr Geynrix – o'sha davrning eng kuchli hujumchilari. Keyin o'zimizning jamoada Anvar Berdiev va Umid Isoqov bor edi.
- Futboldagi birinchi murabbiyingiz kim bo'lgan?
- Birinchi murabbiyim rahmatli Otaxonov Adham aka bo'lganlar. U kishidan futboldagi dastlabki bilimlarni o'zlashtirganmiz. Keyinchalik Yuriy Vazgenovich ham futbolning qator sir-asrorlarini o'rgatganlar. SHular hozirgi kunga kelib o'z murabbiylik faoliyatimda asqatyapti.
- Birinchi urgan golingizni xotiray olasizmi?
- Ha, albatta kechagidek yodimda. "Neftchi" safida "Do'stlik" bilan o'yinda bosh bilan gol urgandim. Uy stadionimiz tamirlanayotgani tufayli o'shanda Toshloq tumanidagi stadionda o'ynagandik.
- "Paxtakor"ga qarshi o'yinlar har doim boshqacha ruhda o'tardi. Futbolchilarga aynan mana shu jamoaga qarshi o'yinda ikki hissa kuch bilan o'ynashga alohida topshiriq berilarmidi?
- O'sha vaqtda chempionlik uchun kurashadigan asosiy davogarlar "Neftchi" va "Paxtakor" jamoalari edi. Bu jamoaga qarshi alohida ishtiyoq bilan tayyorgarlik ko'rardik. Bejiz ikki jamoa o'rtasidagi o'yinlar "o'zbek klasikosi" deb nom olmagan.
- Sochingizni oldirib futbol o'ynashingiz braziliyalik mashhur futbolchi Roberto Karlosga taqlidmidi?
- Yo'q, bu o'zim istagan imij edi. Bir mavsum shu holatda o'ynaganman. O'shanda ham jurnalistlar shu savolni berishgan. Roberto Karlosga o'xshab o'ynasam, nega Evropada o'ynamayapman deb javob berardim.
- "Neftchi" muxlislariga tilaklaringiz...
- Jamoa muxlislaridan juda ko'p yaxshilik ko'rganman. Hali-xamon menga telefon qilib turishadi. "Neftchi"ga hamisha omad yor bo'lishini tilayman. Fikrimcha, O'zbekistondagi eng kuchli muxlislik vodiyda.
Bekzod Tolibov yozib oldi
Bosh sahifaga
211