O'zbekiston chempionatining aksar ishtirokchilari o'quv-mashg'ulot yig'inlarini Turkiyaning Antaliya shahrida davom ettirmoqda. Xususan, SHuhrat Maqsudov boshchiligidagi "Bunyodkor" ham. Toshkent klubi 5 fevral kuni "Asteria Kremlin Palace" mehmonxonasiga kelib joylashdi.
Turkiyaga yig'iniga 24 nafar futbolchi olib kelindi.
Darvozabonlar – Sarvar Karimov, Zafar Safoev, Suhrobjon Sultonov.
Himoyachilar – Avazbek O'lmasaliev, Sardorbek Xursandov, Davronjon Ergashev, Muhammadodil Qahramonov, Xurshid Ubaydullaev, Jahongir O'rozov, Mahmudjon Mahamadjonov, Farhod Mirahmatov.
Yarim himoyachilar – Dilshod Jo'raev, Odiljon Abdurahmonov, Umarali Rahmonaliev, Suhrob Izzatov, Rasul Yo'ldoshev, Bilol Tupliev, Sirojiddin Bashriddinov.
Hujumchilar – Muzaffar Olimjonov, Umidbek Sultonov, Usmonali Ismonaliev, Alfayzi Nematov, Husayn Ergashboev, Farrux Ikromov.
Murabbiylar shtabi dastlabki mashg'ulotlar jarayonida o'yinchilarning jismoniy holatini yaxshilashga etibor qaratyapti. Yig'in yakuniga qadar rejalashtirilgan 5ta o'rtoqlik uchrashuvi esa jamoaviy o'yinni shakllantirish va kamchiliklarni ko'rib olish uchun xizmat qiladi.
"Bunyodkor" matbuot xizmati elon qilgan suratlarda ko'pchilikning etibori Farruh Ikromovga qaratildi. U terma jamoaning SHveciyaga qarshi o'rtoqlik uchrashuvida jarohatlanib, safdan chiqqan edi. Quvonarli jihati, Superliganing o'tgan mavsumida porlagan yarim himoyachi jarohatini davolashga ulgurgan. Ammo, Ikromovning maydonga qaytishi biroz vaqt talab qiladi. U ayni paytda yakka tartibda ishlamoqda.
SHuningdek, jamoa muxlislarini yana bir savol qiynamoqda: mavsum startiga qadar tajribali futbolchilar olib kelinadimi? Bu o'rinli savol. CHunki 2021 yil oxirida yana asosiy tarkibning 6 nafar vakili boshqa jamoalarga o'tib ketdi: Abdulla Abdullaev, Ulug'bek Abdullaev, Lutfulla To'raev, Xurshid G'iyosov, Nurillo To'xtasinov, Mirjahon Mirahmadov.
Bu borada jamoa ustozi SHuhrat Maqsudov bilan suhbatlashdik. Murabbiyning takidlashicha, katta pullar evaziga 1 yillik legionerlarni jalb qilib, natija uchun o'ynash bugungi "Bunyodkor"ning siyosatiga mos kelmaydi. Jamoa ixtiyorida ajoyib akademiya bor. Bugungi rahbariyat va murabbiylar shundan imkon qadar unumli foydalanishni maqsad qilgan.
"Albatta, tarkibda kuchli futbolchilarni jamlash yaxshi, bu murabbiyning ishini engillashtiradi. Yoshlarda esa ishtiyoq kuchli. Ko'zlari yonib turgan yigitlar bilan ishlash yoqimli.
"Bizda akademiya bor. U erda ajoyib yigitlar tarbiyalanmoqda. Imkon qadar o'z "qaldirg'ochlarimiz"ning yo'lini ochishga harakat qilamiz. Ular qancha balandga parvoz qilishsa, biz uchun shunchalik yaxshi", - deydi SHuhrat Maqsudov. SHuningdek, murabbiy Superliganing navbatdagi mavsumida katta sahnaga yangi iqtidorlar chiqishiga vada berdi.
Bosh sahifaga
58
