Antalyadagi mashg'ulotlarda yaqinda klub bilan shartnoma tuzgan SHahzod Ubaydullaev ham ishtirok etmoqda. O'tgan mavsumni Belarus chempionati vakili Soligorskning "SHaxtyor" va "Energetik-BGU"da o'tkazgan hujumchi endilikda faoliyatini yurtimizda davom ettiradi. Bugun "Maqtaaral"ga qarshi kechgan o'rtoqlik uchrashuvidan so'ng Ubaydullaevga bir nechta savollar bilan yuzlandik.
- Faoliyatingizda ilk bor legioner sifatida to'p tepdingiz. Nima, deb o'ylaysiz, dastlabki urinish qanchalik o'zingiz istagandek bo'ldi?
- Har qanday futbolchiga xorijdagi birinchi mavsumi qiyin bo'ladi. CHunki yangi muhit, yangi jamoa, begona insonlarga o'rganishingiz kerak. Keyinchalik o'rganib oldim.
- SHahzod Ubaydullaev bor potencialini ko'rsata olgani yo'q. Har holda bizga shunday tuyuldi. Belarus chempionatida sizga nima to'sqinlik qildi?
- O'zbekistonda beriladigan yuklamalar bilan Belarus chempionatidagi yuklamani farqi bor. Bizda ko'proq texnika va taktikaga etibor beriladi. U erda esa jismoniy tayyorgarlik ustuvor hisoblanadi. Mana shu jihatdan qiynaldim.
- Legionerga aylanishga o'sha vaqt qanchalik tayyor edingiz?
- Men vaqtida legionerga aylandim. O'zbekistonga qaytishim oilaviy sabablarga bog'liq. Evropaning boshqa klublaridan takliflar bor edi.
- Aslida kosonsoyliksiz. Sir bo'lmasa, "Navbahor"dan taklif oldingizmi?
- O'zbekistonga kelishim bilan "Neftchi" taklif bilan chiqdi. O'ylanib o'tirmasdan qabul qildim. Bu jamoa o'z nomi, tarixiga ega.
- Farg'ona klubida to'p tepa turib yana Evropa klublari nazariga tushishingizga ishonasizmi?
- Hali Evropadagi faoliyatim tugamadi. To'purar bo'lishni maqsad qilganman. SHu orqali yana kuchli klublarga yo'l olishim mumkin.
- To'purarlik haqida og'iz ochdingiz. So'nggi mavsumlarda Dragan CHeran bu borada peshqadamlikni hech kimga berayotgani yo'q. U sof hujumchi emas. O'zimizning forvardlar ortda qolayotgnini nima bilan izohlaysiz?
- "Paxtakor" o'zi kuchli jamoa. SHu bois CHeranga osonroq kechadi. O'zbekistondagi eng yaxshi legioner. Ko'rsangiz atrofidagilar CHeran orqali o'ynashadi. Uning to'purar bo'layotgani yonida ko'makchilari ko'p.
Abdulaziz Iskandarov suhbatlashdi
Bosh sahifaga
99
